सीएएफच्या तीन जवानांचा एकमेकांवर गोळीबार, एकाचा मृत्यू

रायपूर : छत्तीसगड सशस्त्र दलाच्या (CAF) तीन जवानांनी एकमेकांवर गोळ्या झाडल्याचा धक्कादायक प्रकार छत्तीसगडच्या बीजापूरमध्ये घडला. या गोळीबारात एका जवानाचा मृत्यू झाला आहे. तर दोघे गंभीर जखमी असल्याची माहिती आहे. जखमी जवानांवर सध्या रुग्णालयात उपचार सुरु आहे (CAF Personnel Open Firing).

माहितीनुसार, बीजापूरच्या फरेसगड येथील सीएएफच्या छावणीत तीन जवानांनी एकमेकांवर गोळीबार केला. जवान दयाशंकर शुक्ला, रविरंजन आणि मोहम्मद शरीफ यांनी एकमेकांवर गोळीबार केला. गोळीबारात तीनही जवान गंभीर जखमी झाले होते. त्यांना जखमी अवस्थेत रुग्णालात दाखल करण्यात आलं. मात्र, उपचारादरम्यान जवान रविरंजन यांचा मृत्यू झाला. तर दोन जवनांवर रुग्णालयात उपचार सुरु आहे.

या जवानांमध्ये कुठल्या मुद्यावरुन वाद झाला आणि त्यांनी एकमेकांवर गोळीबार का केला, याबाबत सध्या कुठलीही माहिती नाही. या जवानांनी हे टोकाचं पाऊल का उचललं याबाबत तपास सुरु असल्याची माहिती पोलिस महानिरीक्षकांनी दिली.

आपआपसांतील गोळीबारात दरवर्षी 100 जवानांचा मृत्यू

रिपोर्टनुसार, दरवर्षी केंद्रीय सशस्त्र दलाच्या सरासरी 100 जवानांचा आपआपसांतील भांडणात मृत्यू होतो. तर दरवर्षी जवळपास 66 जवान कर्तव्यावर असताना शहीद होतात.

गेल्यावर्षीही डिसेंबर महिन्यात छत्तीसगडच्या बस्तरमध्ये आयटीबीपीच्या कडनेर येथील 45 व्या बटालियनच्या छावणीतील जवानांनी एकमेकांवर गोळीबार केला होता. यामध्ये सहा जवानांचा मृत्यू झाला होता, तर दोन जवान जखमी झाले होते.

आकड्यांनुसार, 2016 ते 2018 मध्ये दरवर्षी केंद्रीय सशस्त्र दलाच्या सरासरी 100 जवानांचा मृत्यू झाला आहे. यामध्ये काही जवानांचा आपआपसांतील गोळीबारात मृत्यू झाला, तर काहींनी आत्महत्या केली. यामागे, तणाव हे एक महत्त्वाचं कारण असल्याचं सांगितलं जातं. दुसरीकडे, दरवर्षी जवळपास 66 जवान कर्तव्यावर असताना शहीद होतात.