भारतीय विंग कमांडरला अटक केल्याचा दावा, पाकिस्तानकडून व्हिडीओ जारी

इस्लामाबाद : जम्मू काश्मीरमध्ये युद्धाची स्थिती आहे. भारताने एअर स्ट्राईकनंतर केल्यानंतर पाकिस्तानने मूर्खपणा करत भरदिवसा त्यांची विमानं भारताच्या हवाई हद्दीत घुसवली. पाकिस्तान वायूसेनेच्या विमानांनी भारतीय हद्दीत घुसखोरी करत बॉम्ब फेकण्याचा प्रयत्न केला. पण सतर्क असलेल्या वायूसेनेने ही विमानं पळवून लावली. पण पाकिस्तानकडून आता काही खळबळजनक दावे करण्यात आले आहेत.

यात सर्वात चिंतेचा दावा म्हणजे एका भारतीय पायलटला अटक केल्याचं पाकिस्तान लष्कराचे प्रवक्ते मेजर गफूर यांनी म्हटलंय. भारताचे दोन विमान पाडले, एक काश्मीरमध्ये, तर दुसरं पीओकेमध्ये पाडलं, असा दावा पाकिस्तानने केलाय. विंग कमांडर अभिनंदन कुमार असं या पायलटचं नाव सांगत पाकिस्तानकडून व्हिडीओ जारी करण्यात आलाय.

पाकिस्तानी विमानांनी भारताच्या हद्दीत घुसून बॉम्ब फेकण्याचा प्रयत्न केला. सतर्क असलेल्या भारतीय वायूसेनेने वेळीच उत्तर दिलं आणि हा प्रयत्न हाणून पाडला. विशेष म्हणजे भारतीय वायूसेनेने पाकिस्तानचं सर्वात महत्त्वाचं असलेलं F-16 हे विमान पाडल्याची माहिती आहे. हे विमान पडत असताना पायलट पॅराशूटच्या माध्यमातून पाकिस्तानी पायलटने उडी घेतल्याचंही सांगण्यात येतंय.

दरम्यान, पाकिस्तानने व्हिडीओ जारी केला असला तरी याबाबत भारताकडून अद्याप कोणतंही स्पष्टीकरण देण्यात आलेलं नाही. पाकिस्तानकडून त्यांच्या जनतेला दाखवण्यासाठी हा खटाटोप केला असू शकतो, असाही अंदाज लावण्यात येतोय. तरीही दिल्लीकडून सर्व प्रकारची पडताळणी करण्यात येत आहे.