हाफिज सईदच्या मुसक्या आवळल्या, लाहोरमध्ये बेड्या

लाहोर : 26/11 चा मास्टर माईंड, पाकिस्तानी दहशतवादी हाफिज सईदला पाकिस्तानात अटक करण्यात आली आहे. अटक करुन त्याची न्यायालयीन कोठडीत रवानगी करण्यात आली आहे. पाकिस्तानी मीडियाने याबाबतचं वृत्त दिलं आहे.

पाकविरोधी दहशवादी कारवाईबाबत भारताचा हा मोठा विजय मानला जात आहे. मुंबईवर 26 नोव्हेंबर 2008 रोजी झालेल्या दहशतवादी हल्ल्यात हाफिज सईदची महत्त्वाची भूमिका होती. त्याचे पुरावे भारताने पाकिस्तानला सोपवले होते. मात्र हाफिजच्या मुसक्या आवळण्यात टाळाटाळ करणाऱ्या पाकिस्तानला आंतरराष्ट्रीय दबावासमोर झुकावं लागलं आणि त्याला बेड्या ठोकण्यात आल्या.

पाकिस्तानमध्ये 26/11 बाबत चाललेल्या खटल्यात हाफिज सईदला इतके दिवस अटकच होत नव्हती. या हल्ल्यातील दुसरा आरोपी डेव्हिड हेडलीची साक्ष आणि भारताने दिलेल्या अनेक पुराव्यानंतरही पाकिस्तान हाफिज सईदवर कारवाई करत नव्हतं. मात्र आंतरराष्ट्रीय दबाव आणि भारताच्या कूटनीतीनंतर अखेर हाफिज सईदला बेड्या ठोकण्यात आल्या.

अटक कशी झाली?

हाफिज सईद लाहोरवरुन गुजरांवालाकडे जात होता. त्यावेळी पाकिस्तानी सुरक्षा रक्षकांनी हाफिज सईदला अटक केली. त्याला न्यायालयात हजर केलं असता, त्याची तुरुंगात रवानगी करण्यात आली. आपल्या अटकेविरोधात न्यायालयात धाव घेण्याची भूमिका हाफिज सईदने घेतली आहे.

मुंबईत 26/11 च्या हल्ल्यातील हाफिज सईद हा मास्टरमाईंड आहे. या हल्ल्यात 6 अमेरिकन नागरिकांसह 166 लोकांचा मृत्यू झाला होता. या हल्ल्यात कसाब आणि इतर दहशतवाद्यांना हाफिजने फोनद्वारे माहिती पुरवली होती.

पाकिस्तान सरकारने हाफिजचे नाव एक्झिट कंट्रोल लिस्टमध्ये समाविष्ट केले आहे. त्यामुळे तो पाकिस्तान सोडून जाऊ शकत नाही.

कोण आहे हाफिज सईद? 

• हाफिज सईद हा मोस्ट वॉन्टेड दहशतवादी आहे
• मुंबईवरील 26/11 ला झालेल्या दहशतवादी हल्ल्यात त्याचा प्रमुख हात होता.
• दहशतवादी कसाब आणि त्याच्या सहकाऱ्यांना पाकिस्तानातून मार्गदर्शन करणारा हाफिज सईदच होता
• हाफिज सईद जमात-उल-दावा आणि लष्कर ए तोएबा या दहशतवादी संघटनेचा प्रमुख आहे.
• भारतामध्ये अनेक दहशतवादी कारवाईत या दोन्ही संघटनांचा प्रामुख्याने समावेश आहे.
• काही वर्षांपूर्वी अमेरिकेने जाहीर केलेल्या दहशतवाद्यांच्या यादीत हाफिज सईदचे नाव दुसऱ्या क्रमांकावर होतं.
• हाफिजसाठी एक कोटी डॉलरचे रोख रकमेचे बक्षीस घोषित करण्यात आले होते. हाफिज विरोधात रेड कॉर्नर नोटीस जारी करण्यात आली होती.
• भारतात 13 डिसेंबर 2001 मध्ये संसदेवर झालेल्या हल्ल्याचा कट रचणाऱ्यांमध्ये त्याचा समावेश होता.
• मुंबईतील 11 जुलै 2006 साखळी बॉम्बस्फोट प्रकरणातही त्याचा हात  होता.
• तो भारतातच नव्हे तर जगातील सर्वात मोस्ट वाँटेड दहशतवादी आहे.