‘माझे लेकरु मला परत द्या’ आईच्या हंबरड्यानंतर प्रवीण दरेकरांनाही अश्रू अनावर
सांगलीत विरोधी पक्षनेते प्रवीण दरेकर यांना एका आईचा हंबरडा ऐकून अश्रू अनावर झाल्याचं पाहायला मिळालं.
सांगली : महाराष्ट्रात झालेल्या मुसळधार पावसानंतर राज्यात अनेक ठिकाणी शेतकऱ्यांचं मोठं नुकसान झालंय. याचीच पाहणी करण्यासाठी सांगलीत पोहचलेले विरोधी पक्षनेते प्रवीण दरेकर यांना एका आईचा हंबरडा ऐकून अश्रू अनावर झाल्याचं पाहायला मिळालं. आजच्या सांगली जिल्ह्याच्या दौऱ्यात दरेकर यांनी तडवळे गावाला भेट दिली. या गावातील शुभम जाधव हा 22 वर्षाचा तरुण अतिवृष्टीमुळे पाण्यात वाहून गेला. त्यामुळे जाधव यांच्या कुटुंबियावर दु:खाचा डोंगर कोसळलाय. त्यामुळेच शुभमच्या आईला दुःख अनावर झालं (Opposition leader Pravin Darekar get emotional in Sangli hearing pain of mother).
प्रवीण दरेकर यांनी आज शुभमच्या कुटूंबियांचं सांत्वन केलं. आपलं दु:ख दरेकर यांच्याकडे मांडताना शुभमच्या आईने हंबरडा फोडला.
“माझे लेकरु पाण्यात वाहून गेले. मला माझे पिल्लू परत द्या. माझे लेकरु मला पुन्हा हवे आहे. माझा संसार उध्वस्त झालाय. संसार फाटला, आम्हाला आधार देणारा निघून गेला. पावसाने आमचा घात केला. आमचे भविष्य बरबाद झाले. आता आम्हाला न्याय कोण देणार?” या शब्दात त्या आईने आपली व्यथा दरेकर यांच्याकडे मांडली.
यावेळी आईच्या या व्यथा ऐकून दरेकर यांनाही अश्रू अनावर झाले. विरोधी पक्षनेते दरेकर यांनी संवेदनशीलपणे जाधव कुटुंबियांना धीर दिला. त्यांचा प्रश्न सरकार दरबारी मांडण्याचं आश्वासन दिलं. अतिवृष्टीमुळे बाधित झालेल्या जाधव कुटुंबाला न्याय मिळवून देऊ असं वचन दरेकर यांनी यावेळी दिलं. दरेकरांनी यासंदर्भात तेथे उपस्थित असलेल्या तहसिलदारांशी चर्चा केली.
सांगली जिल्ह्यातील तडवळे गावातील तरूण शुभम जाधव अतिवृष्टीमुळे पाण्यात वाहून गेला, दौऱ्यात मी कुटूंबियांचे घरी जाऊन सांत्वन केले. यावेळी कुटूंबाचे दु:ख ऐकताना मलाही अश्रु अनावर झाले, अतिवृष्टीतील अशा प्रत्येक कुटुंबाला न्याय मिळवून दिल्याशिवाय माझ्या मनाला शांती मिळणार नाही. pic.twitter.com/OTuBrTby4T
— Pravin Darekar – प्रविण दरेकर (@mipravindarekar) October 21, 2020
“हा विषय अतिशय संवेदनशील असून याप्रकरणी आपण जिल्हाधिकाऱ्यांशी बोलू व त्यांना लवकर मदत मिळवून देऊ. ताई आम्ही तुमच्या सोबत आहोत. तुम्ही काळजी करु नका,” या शब्दात दरेकर यांनी त्यांना धीर दिला. अतिवृष्टीमुळे त्यांचं कुटुंब उध्वस्त झालंय, पण अद्यापही कुठलीही शासकीय मदत त्यांना मिळालेली नसल्याचा आरोपही यावेळी त्यांनी केला.
हेही वाचा :
शेतकऱ्यांना दिवाळीपूर्वी आर्थिक मदत, बांधावर जाऊन मंत्री बच्चू कडूंचं आश्वासन
शेतकऱ्यांना तात्काळ मदत करा, अन्यथा आक्रमक पवित्रा घेऊ, प्रवीण दरेकरांचा राज्य सरकारला इशारा
व्हिडीओ पाहा :
