Corona : पुण्यात एका दिवसात 7 कोरोनाबाधितांचा मृत्यू, 12 नवे रुग्ण

पुणे : कोरोनाचं सावट दिवसेंदिवस वाढतच (Pune Deaths Due To Corona) चाललं आहे. पुण्यात तर कोरोनाने अक्षरश: थैमान घातलं आहे. पुण्यात एका दिवसात सात कोरोनाबाधितांचा मृत्यू झाल्याची धक्कादायक घटना घडली आहे (Pune Deaths Due To Corona).

पुण्यात कोरोनामुळे मृत्यू झालेल्यांचा आकडाही वाढत आहे. पुण्यात कोरोनामुळे आतापर्यंत 25 जणांचा बळी गेला आहे. तर एका दिवसात 12 नवे कोरोनाबाधित रुग्ण आढळले आहेत. त्यामुळे नेहमीच्या तुलनेत शहरातील कोरोना बाधितांची वाढ काहिसी आटोक्यात आल्याचं चित्र आहे.

कोरोनामुळे मृत्यू झालेल्या 7 रुग्णांना इतर आजारांनीही ग्रासलेलं होतं. तर, अनेक मृतांचं वयोमान हे 55 वर्षांवरील होतं. गुरुवारी सात वाजेपर्यंत जिल्ह्यात कोरोना ग्रस्त संख्या 206 वर येऊन पोहोचली होती. तर, पुणे शहरातील कोरोनाबाधित रुग्णांची संख्या सध्या 181 इतकी आहे.

दुसरीकडे, कोरोनाचा प्रादुर्भाव रोखण्यासाठी सरकार सर्वतोपरी प्रयत्न करत आहेत (Pune Deaths Due To Corona). मुंबईत झोपडपट्टी भागात लहान घरांमध्ये राहाणाऱ्या नागरिकांची राहण्याची व्यवस्था आता शाळांमध्ये केली जाणार आहे. याशिवाय, सार्वजनिक शौचालयं दर तासाला धुतली जाणार असून निर्जंतुकीकरण केलं जाणार असल्याची माहिती राज्याचे आरोग्य मंत्री राजेश टोपे (Health Minister Rajesh Tope) यांनी दिली आहे.

कोरोनापाढोपाढ राज्यात सारीचे रुग्ण

राज्यात कोरोना विषाणूचे आव्हान असतानाच राज्यातील विविध शहरांमध्ये आता सारी आजार पसरल्याचे समोर आलं आहे. औरंगबाद, हिंगोली, पिंपरी चिंचवड येथे सारी आजाराचे रुग्ण आढळून आले आहेत. सारी आणि कोरोनाची लक्षणं एकसारखीच असल्याचे तज्ञांनी सांगितले आहे. विशेष म्हणजे सारीच्या एका रुग्णाला कोरोना झाल्याचेही समोर आलं आहे. त्यामुळे सारीच्या रुग्णांवरही बारीक लक्ष ठेवलं जात आहे.

पिंपरी चिंचवडमध्ये कोरोनासह आता सारी आजाराचे संकट ओढावले आहे. एका महिलेमध्ये सिव्हीअरली अॅक्युट रेस्पिरेटरी इलनेस अर्थात सारीची लक्षणं आढळून (Sari) आली आहेत. त्यामुळे सर्वत्र एकच खळबळ उडाली आहे. सारी आणि कोरोनाची लक्षणं ही एकसारखीच आहेत. विशेष म्हणजे पुण्यातील महिलेला सारीसह कोरोनाचीही लागण झाल्याचे निष्पन्न झाले (Pune Deaths Due To Corona) आहे.