ओवैसी यांनी उट्टं काढलं, अमरावतीत मोठी खेळी, प्रकाश आंबेडकर यांची पहिल्यांदाच कोंडी?
AIMIM Amravati Lok Sabha Election : एआयएमआयएमने राज्यातील हायहोल्टज मतदारसंघ अमरावतीत, खेळी खेळली आहे. पक्ष प्रमुख असदुद्दीन ओवेसी यांनी या मतदारसंघात उमेदवार दिलेला नाही. त्याऐवजी पक्षाने या आंबेडकरांना पाठिंबा जाहीर केला आहे. भाजपने या मतदारसंघातून नवनीत राणा यांना उमेदवारी जाहीर केलेली आहे.
महाराष्ट्रातील हायहोल्टेज मतदारसंघात अमरावती एक आहे. या मतदारसंघात नवनीत राणा यांना विजयासाठी मोठी कसरत करावी लागण्याची शक्यता आहे. वंचित बहुजन महासंघाचे प्रकाश आंबेडकर यांनी येथे शड्डू ठोकले आहे. तर प्रहारचे बच्चू कडू यांनी पण बंडाचा पवित्र घेतला आहे. एवढंच कमी की काय, तर प्रकाश आंबेडकर यांचे बंधू आणि रिपब्लिकन सेनेचे प्रमुख आनंदराज आंबेडकर यांनी पण अमरावती मतदारसंघावर दावा ठोकला आहे. यामध्ये एमआयएमने मोठे कार्ड खेळले आहे. पक्ष प्रमुख असदुद्दीन ओवेसी यांनी या आंबेडकरांना विजयी करण्याचे आवाहन त्यांच्या कार्यकर्त्यांना केले आहे.
सोशल मीडियावर आवाहन
- ओवेसी यांनी डॉ. बाबासाहेब आंबेडकर यांचे नातू आनंदराज आंबेडकर यांना पाठिंबा जाहीर केला आहे. आनंदराज आंबेडकर यांनी यापूर्वीच लोकसभेसाठी या मतदारसंघातून उमेदवारी जाहीर केली होती. त्यांनी एआयएमआयएमला पाठिंबा देण्याचे आवाहन केले होते. त्यांच्या या आवाहनाला असदुद्दीन ओवेसी यांनी प्रतिसाद दिला. त्यांनी आनंदराज आंबेडकर यांच्या उमेदवारीला जाहीर पाठिंबा दिला.
- ओवेसी यांनी याविषयी सोशल मीडिया प्लॅटफॉर्म X वर एक पोस्ट लिहिली. ” मला डॉ. बाबासाहेब आंबेडकर यांचे नातू आनंदराज आंबेडकर यांना एआयएमआयएमचा पाठिंबा जाहीर करताना मोठा आनंद होत आहे. ते अमरावती लोकसभा मतदारसंघातून निवडणूक लढवत आहेत. मी माझ्या पक्षाच्या कार्यकर्त्यांना, समर्थकांना त्यांना विजयी करण्याचे आवाहन करतो.”, असे त्यांनी पोस्टमध्ये लिहिले आहे.
I am pleased to announce AIMIM support to Mr Anandraj Ambedkar, the grandson of Dr Babasaheb Ambedkar who is contesting Lok Sabha elections from Amravati. I advise my party workers to work for his victory.
— Asaduddin Owaisi (@asadowaisi) April 8, 2024
हे उमेदवार मैदानात
अपक्ष उमेदवार नवनीत राणा यांना भाजपने उमेदवारी दिली आहे. तर काँग्रेसने बलवंत वानखेडे यांना मैदानात उतरवले आहे. महायुतीत सक्रिय असलेल्या प्रहारने विरोधात दंड थोपटले आणि दिनेश बूब यांना उमेदवारी जाहीर केलेली आहे. प्रकाश आंबेडकर यांच्या वंचितने प्राजक्ता पिल्लेवान यांच्या नावाची घोषणा केलेली आहे. तर स्वतः आनंदराज आंबेडकर मैदानात उतरलेले आहेत.
इम्तियाज जलील यांची घेतली भेट
आनंदराज आंबेडकर यांनी छत्रपती संभाजीनगरचे खासदार आणि एमआयएमचे नेते इम्तियाज जलील यांची नुकतीच भेट घेतली. अमरावती मतदारसंघात एमआयएमने त्यांना पाठिंबा द्यावा यासाठी त्यांनी आवाहन केले होते. 2 एप्रिल रोजी जलील यांच्या घरी जाऊन आंबेडकर यांनी निवडणुकीविषयी चर्चा केली होती. अमरावतीसह बुलढाणा, अकोला, वर्धा, यवतमाळ-वाशिम, मराठवाड्यातील हिंगोली, नांदेड आणि परभणी लोकसभा मतदारसंघात दुसऱ्या टप्प्यात 26 एप्रिल रोजी मतदान होणार आहे.