Aurangabad | नमाज पठण करताना Imtiaz Jaleel भावूक, औरंगाबादच्या ईदगाह मैदानावर काय घडलं?

औरंगाबादेत नमाज पठणावेळी खासदार जलील भावूक

Image Credit source: tv9 marathi

औरंगाबादः तब्बल दोन वर्षानंतर औरंगाबादच्या ईदगाह (Eidgah Ground) मैदानावर हजारो मुस्लिम भाविक नमाज अदा करण्यासाठी जमा झाले. यावेळी एमआयएमचे खासदार इम्तियाज जलील (MP Imtiaz Jaleel) हेदेखील उपस्थित होते. सकाळी सव्वा नऊ वाजेच्या सुमारास मुस्लिम भाविकांनी (Muslim Devotees) नमाज पठणास सुरुवात केली. नमाज म्हणजे अल्लाहकडे क्षमा याचना करण्याचा प्रसंग असतो. यावेळी खासदार इम्तियाज जलील अत्यंत भावूक झाले. नमाज पठण सुरु असतानाच त्यांच्या डोळ्यातून अश्रू येऊ लागले. एकिकडे नमाज पठण सुरु होते तर इकडे खासदार जलील डोळ्यांतील अश्रू पूसत होते. त्यामुळे इम्तियाज जलील एवढे भावूक का झाले, असाच प्रश्न सर्वांच्या मनात आला. मात्र नमाज पठण झाल्यानंतर स्वतःच्या भावना आवरत खासदार जलील यांनी माध्यमांसमोर प्रतिक्रिया देताना अश्रू येण्याचं कारण सांगितलं.

का भावूक झाले खासदार जलील?

नमाज पठण झाल्यावर माध्यमांना प्रतिक्रिया देताना, खासदार जलील म्हणाले, मागील दोन वर्षात कोरोना संकटामुळे आपण अनेक प्रियजनांना गमावलं आहे. दोनच महिन्यांपूर्वी मी माझ्या आईला गमावलं. आईशिवाय ही पहिली ईद आहे. त्यामुळे नमाज पठण करताना आठवणींचा बांध फुटला..’

‘देशात शांतता, बंधूप्रेम रहाण्यासाठी प्रार्थना’

ईदनिमित्त देशभरातील मुस्लिम भाविकांना शुभेच्छा देताना खासदार जलील म्हणाले, ‘ दोन वर्षात अनेक नातेवाईक, मित्र गमावले. देशातील स्थिती पाहता, शांतता, बंधूप्रेम राखण्याची गरज आहे. आज देशातील मशिदींवर संकट आलं आहे. नमाज पठणापासून रोखलं जात आहे. ही स्थिती सुधारण्यासाठी आम्ही सर्वांनी दुआ मागितली. सर्वात महत्त्वाचं म्हणजे, देशात शांतता व बंधुप्रेम राहण्यासाठी आम्ही प्रार्थना केली. मोहम्मद पैगंरांनी मानवतेची शिकवण दिली आहे. त्यामुळे इथे फक्त मुस्लिम नव्हे तर देशातील सर्व धर्माच्या लोकांच्या शांततेसाठी आम्ही प्रार्थना केली आहे.’