लोकसभा निवडणुकांदरम्यान चौथ्या टप्प्यामध्ये बीड मतदारसंघातील बुथ कॅप्चर केल्याचा दावा करणारे व्हिडीओ सोशल मीडियावर व्हायरल झाले होते. राष्ट्रवादी शरद पवार गटाचे बजरंग सोनावणे यांनी यावरून टीका केली होती. त्यामुळे बीडमध्ये बोगस मतदान झालं की नाही याबाबत राज्यभरात चर्चा होत होती. बजरंग सोनावणे यांनी आज बीड जिल्हाधिकाऱ्यांची भेट घेतली. या भेटीनंतर बीडच्या जिल्हाधिकारी दीपा मुधोळ यांनी टीव्ही9 मराठीसोबत बोलताना याबाबत स्पष्टीकरण दिलं आहे.
प्रत्येक मतदारसंघनिहाय नेमकी कशा प्रकारे मतमोजणीची प्रक्रिया पार पडते. त्यासाठी किती माणसांची नेमणूक केली जाते. याबाबत बजरंग सोनवणे यांना मतमोजणीची संपूर्ण प्रक्रिया समजावून सांगितली आहे. परळीमधील जे काही आक्षेप होते त्याबाबतचे मेलवर आम्हाला काही व्हिडीओ आले होते. त्यासोबतच पुन्हा मतदान घेण्यात यावं अशी मागणी करण्यात आली होती. परंतु सर्व व्हिडीओ पाहिल्यावर कोणत्याही प्रकारचे बोगस मतदान किंवा बुथ कॅप्चरिंग करण्यात आलं नसल्याचं निदर्शनात न आल्याने पुर्नमतदानाची मागणी नाकारली असल्याचं दीपा मुधोळ यांनी सांगितलं.
देशभरात चौथ्या टप्प्यात मतदान झालं त्यामध्ये बीड मदारसंघाचा समावेश होता. बीडमध्ये भाजपकडून पंकजा मुंडे आणि शरद पवार गटाकडून बजरंग सोनवणे आमनेसामने होते. मतदान झाल्यावर सोशल मीडियावर काही व्हिडीओ व्हायरल झाले होते. ज्यामध्ये एक माणूसच मतदान करत असून नागरिकांना त्यांच्या बोटाला शाई लावून माघारी पाठवलं जात असल्याचं दिसत होतं. हा व्हिडीओ बीडमधील एक बुथ सेंटरवरील असल्याचा दावा केला जात होता. मात्र जिल्हाधिकाऱ्यांनी हे बुथ कॅप्चरिंग झालं नसल्याचं स्पष्टीकरण मुधोळ यांनी दिलं.
बजरंग सोनवणे आज स्ट्राँग रूमकडे पाहणीसाठी आले होते. यावेळी त्यांनी, कांबळे साहेब हात आकडू नका. अन्यथा मी स्वत:ला संपवून घेईन, असं म्हणत सोनवणे यांनी निवडणूक अधिकारी महेंद्र कांबळे यांना धमकी दिली होती. मात्र आता जिल्हाधिकारी दीपा मुधोळ यांनी बजरंग सोनवणेंना मतमोजणीची प्रक्रिया पार पडते याबाबत माहिती देत बोगस मतदान झाल्याचं फेटाळून लावलं आहे.