Digital School : भंडाऱ्याच्या तरुणाने फेडले आईचे ऋण, तेरवीच्या कार्यक्रमाऐवजी गावातील शाळेला दिली ही भेट

मरावे परी किर्ती रुपी उरावे, असं म्हणतात. आईचे निधन झाल्यानंतर मुलानं आईच्या नावानं शाळेला दान दिलं. यातून शाळेत शिक्षणाचा दर्जा (Quality of education) सुधारणार आहे. पारंपरिक रितीरिवाजाला फाटा देत त्यानं हे पाऊल उचललं. विशेष म्हणजे आईनं मला शिकविलं म्हणून मी परदेशात जाऊन नोकरी करू शकतो. चांगले पैसे कमवू शकतो. गावातील मुलांनीही असं शिकावं मोठं व्हावं, असा यामागचा मुलाचा उद्देश. हा उद्देश भंडारा जिल्ह्यातील धोप (Dhop) या खेडेगावात सार्थकी लागला. कारण मुलांना शिकण्यासाठी डिजीटल शाळा (Digital School) तयार झाली.

परंपरेला दिला फाटा

मोहाडीवरून दहा किमी अंतरावर असलेल्या धोप गावातील रहिवासी गुरुदेव शेंडे. त्याची आई 67 वर्षीय यशोदा हिरालाल शेंडे यांचे 24 जुलै रोजी निधन झाले. मृत्यूनंतर तेराव्या दिवशी गावातील लोकांना तेरवीच्या कार्यक्रमाचे भोजन देण्याची परंपरा आहे. पण त्या परंपरेला फाटा देत त्यानं तेरवीचा कार्यक्रम रद्द केला. तेरवीच्या कार्यक्रमाचा खर्च शाळाला डिजीटल करण्यासाठी वापरला.

शाळेला मिळाले संगणक, प्रोजेक्टर

धोप गावातील जिल्हा परिषद शाळेला मदत केली. यासाठी गुरुदेवनं आपले भाऊ शशिकांत हिरालाल शेंडे, उमेश हिरालाल शेंडे यांचे मत विचारले. त्यानंतर सर्वाचे एकमत झाले. गावातील जिल्हा परिषद शाळेला डिजीटल शाळा करण्यासाठी एक लाख रुपयांची मदत केली. आता या पैशाने शाळेला संगणक, प्रोजेक्टर आदी सुविधा मिळाल्या. गुरुदेव शेंडे या तरुणाने नक्कीचे आईचे ऋण फेडले. त्याच्या आईचे नाव आता सतत स्मरणात राहणार आहे.

जिल्हा परिषदेला शाळेचा फायदा

लोकं तेरवीच्या कार्यक्रमात पैसे खर्च करतात. लोकांना जेऊ घालतात. हेच पैसे असे गुरुदेवने शिक्षणाच्या कामात लावले. याचा गावातील शाळेला फायदा होणार असल्याचं मुख्याध्यापक मनोहर भगत व उपसरपंच तुलसी मोहतुरे यांनी सांगितलं.