धक्कादायक! गोंदियात सांभाळायला दिले तिनेच केली मुलाची विक्री, आई पाहायला गेली तेव्हा फुटले बिंग
सहा वर्षाच्या मुलाची 1 लाख 20 हजार रुपयांत विक्री केल्याचे प्रकरण उघडकीस आले. आईने दुसरे लग्न केले म्हणून सांभाळ करण्यासाठी मुलाला दिले होते. आई आपल्या मुलाला पाहायला आली आणि प्रकरणाचे बिंग फुटले. मुलाची विक्री करणाऱ्या पाच आरोपींना अटक करण्यात आली आहे.
गोंदिया : देशात मूल चोरी आणि विक्री करण्याच्या घटना आपण नेहमीच पाहतो. मात्र सांभाळ करण्यासाठी दिलेल्या मुलाला चक्क विक्री करण्याची घटना गोंदिया येथे घडली. पहिल्या पतीपासून झालेला मुलगा दुसऱ्या महिलेला सांभाळ करण्यासाठी दिला. स्वत: दुसरे लग्न करणारी आई दोन वर्षांनंतर आपल्या मुलाची विचारपूस करण्यास गेली. परंतु ज्या महिलेकडे आपला मुलगा दिला. तिच्याजवळ आपला मुलगाच नाही, अशी खात्री पटताच आईने गोंदिया शहर पोलिसात ( Gondia city police) धाव घेतली. गोंदिया पोलिसांनी या प्रकरणात चौकशी केली असता त्या सहा वर्षांच्या मुलाची एक लाख वीस हजार रुपयात भंडारा जिल्ह्यात विक्री (sale in Bhandara district) केल्याची बाब पुढे आली आहे. या प्रकरणात पाच जणांना अटक (five arrested) करण्यात आली आहे.
मुलगा न दिसल्याने आला संशय
गोंदियातील एका महिलेला पहिल्या पतीपासून असलेला चिकू (बदललेले नाव) याला 2020 मध्ये गोंदियातील मंगला उर्फ मनीषा संतोष चंद्रिकापुरे हिच्याकडे सांभाळायला दिले होते. मंगला चंद्रिकापुरे हिने त्या महिलाचे लग्न जळगावच्या चारडी येथील एका इसमाशी लावून दिले. तुझ्या मुलाचे मी संगोपन करेन, असे तिने महिलेला म्हटले होते. मंगलावर विश्वास ठेवून महिलेने दुसरे लग्न केले. मात्र जेव्हा ती मुलाच्या भेटीसाठी 22 फेब्रुवारी 2022 रोजी गोंदियात आली असता आरोपी मंगलाकडे तिचा मुलगा नव्हता. तिने मुलासंदर्भात विचारपूस केली. त्यावेळी तिने उत्तर दिले नाही. माझ्या मुलाचे अपरहण झाले असावे किंवा त्याची विक्री झाली असावी, असा संशय घेतला.
गोंदिया येथील मुलाच्या विक्री प्रकरणी पोलीस काय म्हणतात.. pic.twitter.com/hmFQVgbXDi
— Govind Hatwar (@GovindHatwar) March 9, 2022
पाच आरोपींना अटक
आईने गोंदिया शहर पोलिसात तक्रार केली. गोंदिया पोलिसांनी 1 मार्च रोजी या संदर्भात भादंवि कलम 363 अन्वये गुन्हा दाखल केला होता. चौकशी केली असता तो मुलगा भंडारा जिल्ह्यातील आंधळगाव येथे असल्याची माहिती मिळाली. पोलीस पथकाने तेथे जावून काजोल छोटेलाल भुरे आणि त्यांची पत्नी अनिता भुरे यांच्याकडे आढळून आला. त्यांनी त्या मुलाला सुखदेव डोये आणि अनिता हटवार यांच्यामार्फत खरेदी केले असल्याचे सांगितले. पाच आरोपींना अटक करण्यात आली आहे. या प्रकरणात अजून आरोपी सापडण्याची शक्यता आहे. गोंदिया पोलीस पुढील तपास करीत आहेत, अशी माहिती पोलीस निरीक्षक महेश बनसोडे यांनी दिली.
