गुलाबराव पाटील यांच्या विरोधात संजय राऊत यांनी थोपटले दंड, गुलाबो गॅंग म्हणत…
संजय राऊत आणि गुलाबराव पाटील यांच्यात पाचोरा येथील सभेपूर्वी एकमेकांमध्ये चांगलीच जुंपल्याचं पाहायला मिळत आहे. जळगावमध्ये जाऊन संजय राऊत यांनी पुन्हा आव्हान दिले आहे.
जळगाव : शिंदेंच्या शिवसेनेचे नेते तथा मंत्री गुलाबराव पाटील यांनी ठाकरे गटाचे खासदार संजय राऊत यांच्या चांगलीच जुपली आहे. पाचोरा येथे माजी मुख्यमंत्री तथा शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांच्या उपस्थित सभा होणार आहे. या सभेच्या पार्श्वभूमीवर उत्तर महाराष्ट्राचे संपर्क प्रमुख तथा खासदार संजय राऊत हे जळगाव दौऱ्यावर आहेत. रविवारी होणाऱ्या सभेच्या तयारीचा आढावा घेण्यासाठी गेलेल्या संजय राऊत यांनी गुलाबराव पाटील यांच्यावर चांगलाच हल्लाबोल केला आहे. संजय राऊत यांनी गुलाबराव पाटील यांना त्यांचे राजकीय भविष्य सांगत मूळ शिवसेना जागेवरच असल्याचे सांगत आव्हान दिले आहे. संजय राऊत यांनी यावेळेला स्थानिक राजकारणावरुन गुलाबराव पाटील यांना चिमटेही काढले आहे.
संजय राऊत म्हणाले, मूळ शिवसेना ही उद्धव ठाकरे यांचीच आहे. आमदार आणि खासदार गेले असतील पण मूळ शिवसेना जागेवर आहे. जळगावमधील सर्व पदाधिकारी इथेच आहे. जे आमदार गेले ते परत कधी निवडून येणार नाही. मग निवडणूक आयोग काय नंतर पक्षाचे नाव आणि चिन्ह परत आम्हाला देणार आहे का?
पैशाच्या जोरावर आमदार गेले असतील पण शिवसेना जागेवरच आहे. 2024 ला यांचा पराभव निश्चित आहे. कोणत्याही क्षणी निवडणुका घ्या हे सिद्ध होईल. गुलाबराव पाटील यांनी सांगावं मी तिथेच राहून दाखवतो. गुलाबराव पाटील पाटील यांना वाटत असेल की मी त्या हॉटेल मध्ये राहावं तर मी राहून दाखवतो त्यांनी घुसून दाखवावं असं खुलं आव्हान संजय राऊत यांनी दिले आहे.
खरंतर गुलाबराव पाटील म्हणजे गुलाबो गॅंग आहे. एक चित्रपट होता तसे हे आहे म्हणत संजय राऊत यांनी गुलाबराव पाटील यांच्यावर हल्लाबोल केला आहे. पाचोरा येथील सभेत आमच्यावर बोलाल तर सभेत घुसेल असं गुलाबराव पाटील म्हणाले होते. त्यावर संजय राऊत यांनी घुसून दाखवा असे म्हंटल्यावर गुलाबराव पाटील बॅकफुटवर गेले होते.
त्यानंतर आज पुन्हा संजय राऊत यांना गुलाबराव पाटील यांच्यासह त्यांच्या समर्थकांनी हॉटेल मध्ये घुसू असा इशारा दिला आहे. त्यावर संजय राऊत यांनी त्यांचे आव्हान स्वीकारत गुलाबराव पाटील सांगत आहे त्याच हॉटेलमध्ये राहून दाखवतो, घुसून दाखवा म्हणत संजय राऊत यांनी पुन्हा आव्हान दिलं आहे.
दरम्यान गुलाबराव पाटील यांच्या राजकीय भविष्यावर संजय राऊत यांनी भाष्य करत ते परत निवडून येणार नाही म्हणत हल्लाबोल केला आहे. त्यामुळे पाचोऱ्याच्या सभेपूर्वी संजय राऊत आणि गुलाबराव पाटील यांच्यात आव्हान प्रतीआव्हान सुरू असल्याचे पाहायला मिळत आहे.
