मराठा क्रांती मशाल मार्चची नियमावली, शांततेत मोर्चा काढून मुख्यमंत्र्यांना निवेदन देणार

मुंबई : मराठा आरक्षणाच्या मुद्द्यावर मराठा समाजाच्यावतीने मुंबईत मातोश्रीावर मराठा क्रांती मशाल मार्च काढण्यात येणार आहे. त्या पार्श्वभूमीवर मराठा क्रांती मोर्चानं मशाल मोर्चामध्ये शिस्त पाळली जावी आणि कोणतंही गालबोट लागू नये म्हणून नियमावलीच तयार केली आहे. आतापर्यंत मराठा क्रांती मोर्चाकडून सर्व नियम पाळून राज्यभरात शांततेत मोर्चे काढण्यात आले आहेत. त्याचप्रमाणे मशाल मार्चाही शांततेत काढण्यात येणार असल्याची माहिती आयोजकांनी दिली (Guidlines for Maratha Kranti Mashal Morcha for Maratha Reservation).

मराठा क्रांती मशाल मोर्चासाठी सर्व आंदोलक कलेक्टर ऑफिस समोरील गार्डन येथे जमणार आहेत. मशाल मोर्चात सहभागी होणाऱ्या आंदोलकांसाठी बांद्रे, खेरवाडी येथे पीडब्ल्यूडी ग्राऊंडमध्ये वाहने पार्किंगची सोय करण्यात आली आहे. मशाल मार्चच्या माध्यमातून आपल्या मागण्यांसाठी शेवटचा पर्याय म्हणून मुख्यमंत्र्यांकडे न्याय मागण्यासाठी जात असल्याचंही मराठा क्रांती मोर्चाकडून सांगण्यात आलं.

मराठा क्रांती मशाल मोर्चाची नियमावली

• आपल्या मशाली या प्रतीकात्मक असतील.
• कायदा सुव्यवस्थेचा आदर करता कृपया खऱ्या मशाली आणू नयेत.
• आपापली वाहने नेमून दिलेल्या वाहनतळावर पार्क करून शांततेच्या मार्गाने दिलेल्या नियोजित ठिकाणी जमावे.

मार्चमध्ये फक्त खालील घोषणा दिल्या जाणार

1) जय भवानी जय शिवराय
2) एक मराठा लाख मराठा
3) तुमचं आमचं नातं काय जय जिजाऊ जय शिवराय
4) आरक्षण आमच्या हक्काचं नाही कुणाच्या बापाचं.

नेहमीप्रमाणे मराठा क्रांती मशाल मार्च शांततेत पार पडेल. मुख्यमंत्र्यांना आपल्या मागण्यांचे निवेदन देऊन हा मोर्चा संपेल, अशीही माहिती देण्यात आली आहे.

संबंधित बातम्या :

वेळ पडल्यास मराठा आरक्षणासाठी रथीमहारथींना साष्टांग नमस्कार घालेन: उदयनराजे भोसले

मराठा आरक्षणावर आता तुम्हीच मार्ग काढा; मराठा आंदोलक शरद पवारांना भेटणार

मराठा विरुद्ध ओबीसी वाद निर्माण करण्याचं काही राजकीय पक्षाचं षडयंत्र; अशोक चव्हाण यांचा आरोप

व्हिडीओ पाहा :

Guidlines for Maratha Kranti Mashal Morcha for Maratha Reservation