ब्रिटनहून दीड हजार प्रवासी मुंबईत परतले, बीएमसीने यादी मागवली, पुढे काय?
गेल्या महिन्याभरात लंडनहून मुंबईत आलेल्या प्रवाशांचे सर्वेक्षण करण्याचे आदेश सरकारने महापालिकांना दिले
मुंबई : ब्रिटनमध्ये आढळलेल्या कोरोनाच्या नव्या अवतारामुळे भारतासह सर्वच देशात धाकधूक वाढली आहे. खबरदारीचा उपाय म्हणून राज्यात 25 नोव्हेंबरपासून इंग्लंडहून किती प्रवासी आले, याचे सर्वेक्षण सुरु करण्यात आले आहे. त्यानुसार मुंबईत या काळात सुमारे दीड हजार प्रवासी ब्रिटनमधून आल्याचे आढळले आहे. मुंबई महापालिकेने त्यांच्याशी संपर्क साधण्यास सुरुवात केली आहे. (More than thousand Visitors returned Mumbai from Britain from last month)
गेल्या महिन्याभरात लंडनहून मुंबईत आलेल्या प्रवाशांचे सर्वेक्षण करण्याचे आदेश राज्य सरकारने सर्व महापालिकांना दिले होते. त्यानंतर मुंबई महापालिकेनेही अशा सर्व प्रवाशांना आवश्यक ती काळजी घ्यावी आणि कोरोनाची लक्षणे जाणवल्यास तात्काळ पालिकेच्या वॉर रुमशी संपर्क साधावा, कोरोनाची चाचणी करुन घ्यावी, असे आवाहन केले होते.
मुंबई महापालिकेने विमानतळ प्राधिकरणाकडून मुंबईतील प्रवाशांची यादी गुरुवारी मागवली. त्यानुसार सुमारे दीड हजार प्रवासी या कालावधीत ब्रिटनमधून मुंबईत आले असल्याचे आढळून आले. या सर्व यादीतील प्रवाशांची माहिती पालिकेच्या 24 विभागांकडे पाठवण्यात आली आहे. विभाग कार्यालयांतील नियंत्रण कक्षाद्वारे या प्रवाशांशी संपर्क साधून त्याची माहिती घेण्यात येत आहे.
मुंबईत नाईट कर्फ्यू
मुख्यमंत्री उद्धव ठाकरे यांनी महापालिका क्षेत्रात रात्री 11 ते पहाटे सहा वाजेपर्यंत रात्रीची संचारबंदी लागू करण्याचा निर्णय घेतला आहे. पाच जानेवारीपर्यंत नाईट कर्फ्यू लागू असेल. नवीन वर्ष उंबरठ्यावर आहे. नाताळपासूनच नववर्षाचा जल्लोष सुरु होतो. या काळात नागरिकांकडून हलगर्जी होऊ नये आणि कोरोना संसर्ग वाढू नये, यासाठी प्रशासन सतर्क झालं आहे. दरवर्षी डिसेंबर अखेरीस अनेक जण रात्रभर सेलिब्रेशन करतात. मात्र घराबाहेर एकत्र जमून होणाऱ्या जल्लोषावर मर्यादा यावी, यासाठी अतिरिक्त बंधनं घालण्यात आली आहेत. (More than thousand Visitors returned Mumbai from Britain from last month)
ब्रिटनमधील कोरोनाचा नवा स्ट्रेन
कोरोनाचा नवा स्ट्रेन जुन्या रुपांपेक्षा अधिक घातक असल्याचं बोललं जातं. जुन्या अवतारांच्या तुलनेत हा वेगाने पसरत असल्याचं निरीक्षण नोंदवलं गेलं आहे. कोरोनाच्या दुसऱ्या स्ट्रेनच्या दोन केसेस सापडल्याची माहिती ब्रिटनच्या आरोग्य सचिवांनी दिली आहे. विषाणूचा नवा अवतार दक्षिण आफ्रिकेतून आल्याचा संशयही त्यांनी व्यक्त केला आहे.
दरम्यान, ब्रिटनहून आलेले तब्बल 20 जण कोरोना पॉझिटिव्ह सापडले होते. त्यामुळे भारत सरकारने युकेहून (UK) येणाऱ्या प्रवाशांसाठी कठोर गाईडलाईन्स जारी केल्या आहेत. यामध्ये विमानतळावर प्रत्येकाची RT-PCR चाचणी करणे अनिवार्य असेल. निती आयोगचे सदस्य (आरोग्य) डॉ. व्ही के पॉल यांनी मंगळवारी सांगितलं, की याबाबत घाबरण्याची गरज नाही. पण आणखी सतर्क राहण्याची गरज आहे.
संबंधित बातम्या :
इंग्लंडवरुन नागपुरात आला, तिथून गोंदियाला गेला, कोरोना पॉझिटिव्ह सापडल्याने विदर्भाला धाकधूक
ब्रिटनहून आलेले 20 जण कोरोना पॉझिटिव्ह, प्रवाशांवर सरकारची नजर
कोरोनाच्या नव्या स्ट्रेनशी भारताची लढाई, केंद्र सरकारच्या गाईलाईन्स वाचल्या का?
(More than thousand Visitors returned Mumbai from Britain from last month)
