चक्रीवादळाचा संभाव्य धोका, मुंबईकरांसाठी महापालिकेच्या महत्त्वाच्या सूचना
समुद्र किनार्‍यापासून लांब रहावे, झाड आणि खांब यांच्याखाली नागरिकांनी उभे राहू नये, वादळाच्या कालावधीमध्ये घराबाहेर पडू नये, असे आवाहन करण्यात येत आहे. (Mumbai BMC Pracautions Nisarga Cyclone Warning)
मुंबई : महाराष्ट्राच्या पश्चिम किनारपट्टीवर उद्या (बुधवार 3 जून रोजी) निसर्ग चक्रीवादळ धडकण्याची शक्यता हवामान खात्याने वर्तवली आहे. या पार्श्वभूमीवर बृहन्मुंबई महानगरपालिका क्षेत्रातील सर्व यंत्रणांना सतर्क राहण्याचे निर्देश देण्यात आले आहेत. मुंबईकर नागरिकांनीही आवश्यक ती खबरदारी आपल्या स्तरावर बाळगावी, असे आवाहन महापालिका आयुक्त इक्बाल सिंह चहल यांनी केले आहे. (Mumbai BMC takes Pracautions ahead of Nisarga Cyclone Warning)
अरबी समुद्रात कमी दाबाचा पट्टा तयार होत असून त्याचे रुपांतर चक्रीवादळामध्ये होण्याची शक्यता आहे. हे चक्रीवादळ बुधवारी पश्चिम किनारपट्टी भागावर धडकण्याची शक्यता हवामान खात्याने वर्तवली आहे. या कालावधीमध्ये वेगवान वारे वाहण्याची शक्यता असून सोबत जोरदार पाऊस देखील कोसळू शकतो. ही स्थिती लक्षात घेता महापालिकेचा मुख्य नियंत्रण कक्ष आणि विभागवार नियंत्रण कक्ष पुरेशा मनुष्यबळासह सज्ज करण्यात आले आहेत.
तटरक्षक दल, नौदल, मुंबई अग्निशमन दल यांच्यासह राष्ट्रीय आपत्ती निवारण दलाची पथके सुसज्ज करण्यात येत आहेत. केंद्र व राज्य शासनाच्या आदेशाप्रमाणे आवश्यक ती कार्यवाही महानगरपालिका प्रशासनाकडून तातडीने हाती घेण्यात आली आहे.
मुंबईतील सर्व 24 विभाग कार्यालयाच्या अधिकाऱ्यांना आपल्या विभागातील संभाव्य धोका पोहोचू शकणाऱ्या वसाहती तसेच सखल भागातील वसाहती निश्चित करण्याच्या सूचना आहेत. तिथल्या रहिवाशांना जवळपासच्या शाळांमध्ये अथवा सुरक्षित ठिकाणी स्थलांतरित करण्याचे निर्देश देण्यात आले आहेत.
मच्छीमार व इतरांनीही समुद्रात जाऊ नये, समुद्र किनार्‍यापासून लांब रहावे, झाड आणि खांब यांच्याखाली नागरिकांनी उभे राहू नये, वादळाच्या कालावधीमध्ये घराबाहेर पडू नये, असे आवाहन करण्यात येत आहे.
हवामान खात्याच्या अंदाजानुसार, राज्याच्या पश्चिम किनारपट्टीवर ३ जून रोजी चक्रीवादळ येण्याची शक्यता आहे. मुंबईतील सर्व यंत्रणा सतर्क व सज्ज आहेत.
नागरिकांनी समुद्र किनाऱ्यापासून लांब रहावे, झाडाखाली थांबू नये, घराबाहेर जाऊ नये, योग्य खबरदारी व काळजी घेण्याचे आवाहन करण्यात येत आहे. pic.twitter.com/qXgpx1KhLE— माझी Mumbai, आपली BMC (@mybmc) June 1, 2020
मुंबईतील मोठ्या औद्योगिक आस्थापना आणि पेट्रोकेमिकल कंपन्यांनी आपली यंत्रणा व सामुग्री सुरक्षित ठेवण्यासाठी योग्य त्या उपाययोजना तातडीने कराव्यात. मुंबईतील सर्व रुग्णालयांनी वीज जनित्र (जनरेटर) कार्यान्वित आहेत, याची दक्षता घेऊन वीजपुरवठा अखंड सुरु राहील, याची तजवीज करावी, असे निर्देशही देण्यात आले आहेत.
हेही वाचा : कोकण किनारपट्टीला चक्रीवादळाचा धोका, NDRF ची टीम तैनात, ठाणे-पालघरमध्ये मुसळधार पावसाचा अंदाज
नागरिकांनी अफवांवर विश्वास ठेवू नये, आवश्यक साधने जवळ बाळगावीत आणि वैयक्तिक स्तरावर देखील खबरदारी घ्यावी, असे आवाहन महानगरपालिका प्रशासनाच्या वतीने करण्यात येत आहे. (Mumbai BMC Pracautions Nisarga Cyclone Warning)