Mihir Shah : वरळी हिट अँड रन प्रकरणात मिहीर शहाचा अजून एक ‘कारनामा’; पोलिसांनीच केला धक्कादायक खुलासा

मिहीर शाह याचा कारनामा

मुंबईतील वरळी हिट अँड रन प्रकरणात मुख्य आरोपी मिहीर शहा याचा अजून एक कारनामा समोर आला आहे. त्याने या गुन्ह्यात वापरलेल्या कारबाबत पोलिसांनीच धक्कादायक खुलासा केला आहे. दरम्यान मिहीर शहाचा चालक परवाना रद्द करण्यासाठी मुंबई पोलीस, प्रादेशिक परिवहन कार्यालयाला, आरटीओला पत्र पाठवणार असल्याची माहिती समोर येत आहे. या प्रकरणात आता एका मागून एक खुलासे समोर येत आहेत.

भरधाव कार चालविल्याने कापले चलन

वरळी हिट अँड रन प्रकरणात मिहीर शहाने गुन्ह्यात वापरलेल्या कारबाबत धक्कादायक खुलासा समोर आला आहे. मिहीरने गुन्ह्यांत वापरलेल्या कारवर या आधीही पोलिसांनी दोनवेळा कार भरधाव वेगात चालवल्या प्रकरणी चलन कापल्याचे समोर आले आहे.

२३ फेब्रुवारी रोजी खालापूर टोल नाक्याजवळील सीसीटीव्हीत ही कार भरधाव वेगातने जात असल्याचे कैद झाले आहे. यावेळी त्या मार्गावरील वेग मर्यादा ही १०० असताना, गाडीचा वेग मात्र ताशी १११ किमी इतका होता. त्यावर महाराष्ट्र पोलिसांनी २ हजारांचं चलन कापले होते.

तर ७ नोव्हेंबर २०२३ रोजी पनवेल येथील टोल नाक्यावर ८० किमीची वेगमर्यादा असताना. गाडीचा वेग मात्र ८८ किमी इतका होता. त्यानुसार गाडीवर २००० रुपयांचा दंड लावण्यात आला आहे. या शिवाय त्या गाडीवर धोकादायक परिस्थितीत गाडी रस्त्यावर उभी केल्याप्रकरणी ५०० रुपयांची दंडात्मक कारवाईही करण्यात आली आहे.

अपघातावेळी पण कार भरधाव

तपासात ज्यावेळी हा अपघात घडला, त्यावेळीही गाडी भरधाव वेगात असल्याचे निरीक्षण तपास अधिकाऱ्यांनी नोंदवलं आहे.तर गाडीचा इन्शूरन्स हा १६ मे २०२४ मे रोजी संपला असल्याची माहिती समोर येत आहे.या कारचे मूळ मालक हे राजेश दोषी नावाची व्यक्ती असून त्याच्याकडून मिहीर शहानं ही गाडी विकत घेतल्याची माहिती सूत्रांनी दिली.

मात्र अधिकृतरित्या मिहीरनं गाडी विकत घेतली आहे का? त्याबाबत काही कागदोपत्री व्यवहार केला आहे का ? याचाही तपास पोलिस करत आहे. प्रथम दर्शनी या तीनही चलनाची रक्कम ही अद्याप भरलेली नसून गाडीवर ४ हजार ५०० इतकी दंडात्मक रक्कम भरणे बाकी असल्याचे निदर्शनास येत आहे.