Teera Kamat : कामत कुटुंबियांना मोठा दिलासा, तीराच्या औषधांच्या करमाफीबाबत राज्य सरकारचं पत्र

तीरा कामत

मुंबई : स्पायनल मस्क्युलर अॅट्रॉफी (SMA) हा दुर्धर आजाराने ग्रासलेल्या तीराच्या आई-वडिलांना राज्य सरकारनं मोठा दिलासा दिला आहे. SMA आजारावर लागणारे इंजेक्शन अमेरिकेतून भारतात मागवण्यासाठी जे सीमा शुल्क अर्थात कस्टम ड्यूटी भरावी लागणार होती. ती माफ व्हावी यासाठी राज्याच्या आरोग्य विभागानं कामत कुटुंबियांना एक पत्र दिलं आहे. असं असलं तरी हे औषध भारतात येण्यासाठी अजून 15 दिवसांचा कालावधी लागण्याची शक्यता आहे. राज्य सरकारच्या आरोग्य विभागानं उचललेलं हे पाऊल नक्कीच सकारात्मक आहे. त्यामुळे तीराच्या आई-वडिलांवर असलेल्या जवळपास 5 कोटी रुपये जमा करण्याचा ताण हलका होणार आहे.(State Government’s letter for waiver of customs duty on Tira Kamat medicine)

5 महिन्यांच्या चिमुकल्या तीरावर सध्या तिच्या अंधेरीतील घरी पोर्टेबल व्हेंटिलेटरवर उपचार सुरु आहेत. तीराची प्रकृती स्थित असल्याची माहिती तिच्या कुंटुंबियांनी दिली आहे. दरम्यान, चिमुकलीच्या रक्ताचा एक अहवाल येणं अद्याप बाकी आहे. तो अहवाल पुढील 2 – 3 दिवसांत आल्यानंतर तीराला औषध मिळणं शक्य होणार आहे.

लेकीसाठी आई-वडिलांची धडपड

स्पायनल मस्क्युलर अॅट्रॉफी (SMA) हा दुर्धर आजार आहे. तीरा कामत या चिमुकलीला हा आजार झाल्याचं लक्षात आल्यानंतर आपल्या लेकीला वाचवायचं आहे. तिला हे जग दाखवायचं आहे, असा मनाशी निश्चय करुन तीराच्या आई-वडिलांनी क्राऊड फंडिंगचा पर्याय निवडला. त्यासाठी कामत कुटुंबियांना अनेक दानशूर व्यक्ती, सेवाभावी संस्थांनी मदत केली. त्यातून तब्बल 16 कोटी रुपयांची रक्कमही उभा केली. पण एक वेगळीच अडचण या कुटुंबियांसमोर उभी राहिली होती. कारण, अमेरिकेतून हे औषध भारतात आणण्यासाठी कस्टम ड्यूटी अर्थात सीमा शुल्क लागणार आहे. त्यासाठी थोडेथोडके नाही तर 2 ते ५ कोटी रुपये लागणार होते. त्यामुळे कामत कुटुंबाने हे सीमा शुल्क माफ करण्याची विनंती राज्य आणि केंद्र सरकारला केली होती.

अखेर राज्य सरकारच्या आरोग्य विभागानं त्या चिमुकलीच्या जीव वाचवण्यासाठी सकारात्मक पाऊल उचललं आहे. त्याबाबतचं एक पत्र आरोग्य विभागानं कामत कुटुंबाला सोमवारी पाठवलं आहे. आता हे पत्र कामत कुटुंब संबंधित औषध कंपनीला पाठवणार आहे. या पत्राच्या आधारे तीराच्या औषधावरील कर माफ होण्यास मदत होणार आहे. त्यामुळे कामत कुटुंबाला राज्य सरकारच्या या पत्राद्वारे मोठा दिलासा मिळाला आहे.

काय आहे स्पायनल मस्क्युलर अॅट्रॉफी?

स्पायनल मस्क्युलर अॅट्रॉफी या आजाराला मेडिकल टर्ममध्ये SMA म्हणतात. हा आजार एकप्रकारे जेनेटिक डिसिज अर्थात जनुकीय बदलांमुळे होणारा आजार असल्याचं तज्ज्ञ सांगतात. या आजारात शरीरातील स्नायू कमकुवत होतात. सुरुवातीला हात, पाय आणि पुढे फुफ्फुसांच्या स्नायुंची शक्ती कमी होत जाते. त्याचबरोबर चेहरा आणि मानेच्या स्नायुंचं काम कमी होऊन गिळताना अडचण निर्माण होते. त्यामुळे रुग्णाला हालचाल करणंही कठीण बनतं. रुग्ण एकप्रकारे रेस्पिरेटरी पॅरलेलिससमध्ये जातो. हा आजार दिवसेंदिवस वाढत जातो.

संबंधित बातम्या :

Teera kamat : चिमुकल्या तीराला वाचवण्यासाठी 16 कोटी उभारले! सीमा शुल्कामुळे उपचाराला उशीर, आई-वडिलांची धडपड सुरुच

Dieting side Effects | वजन कमी करण्यासाठी ‘डाएटिंग’ करताय? सावधान! आधी हे दुष्परिणाम वाचाच…

State Government’s letter for waiver of customs duty on Tira Kamat medicine