अनियंत्रीत इनोव्हा गाडीची रस्ता दुभाजक ओलांडून ब्रेझाला धडक, अपघातानंतर जे घडले ते भयानक

रवी खरात, प्रतिनिधी, नवी मुंबई : अनियंत्रित कार रस्ता दुभाजकाला तोडून विरुद्ध दिशेने येणाऱ्या कारवर आदळली. या अपघातात एका ज्येष्ठ नागरिकाचा जागीच मृत्यू झाला. तर चार जण जखमी झाले. अपघातानंतर इनोव्हाचा चालक पसार झाला. पनवेलजवळील गव्हाण फाटा येथे उरणकडून पनवेलच्या दिशेने भरधाव जाणाऱ्या इनोव्हा चालकाचे नियंत्रण सुटले. त्याची कार दुसऱ्या ब्रेझा कारला जाऊन धडकली. या भीषण अपघातात एक जण ठार झाला. असून चार जण गंभीर जखमी झाले आहेत. सर्व जखमींना बेलापूर येथील अपोलो तसेच कामोठे येथील एमजीएम हॉस्पिटलमध्ये दाखल करण्यात आले.

कार रस्ता दुभाजकाला तोडून गेली

इन्होवा गाडी क्रमांक एम एच ४३ ए डब्लू २४३० वरील चालकाने त्याच्या ताब्यातील वाहन घेऊन उरण येथून पनवेलच्या दिशेने भरधाव जात होता. त्याची गाडी गव्हाण फाटा येथे आली असताना इनोव्हा कार चालकाचे नियंत्रण सुटले. त्यामुळे कार रस्तादुभाजक तोडून विरुद्ध दिशेच्या मार्गावर गेले.

इन्होवा चालक गाडी सोडून पसार

पनवेल येथून उरणच्या दिशेने जाणाऱ्या ब्रेझा गाडी क्रमांक एम एच ४३ सी. सी. ८३७३ या कार वर धडकली. या अपघातात ब्रेझा कारमधील नारायण थोटे वय ७१ राहणार कोपरखैरणे हे गंभीररित्या जखमी झाले. यात त्यांचा मृत्यू झाला आहे. इतर चार जण जखमी झाले आहेत. या अपघातानंतर इन्होवा चालक गाडी सोडून पसार झाला आहे.

दोन्ही वाहनांचे नुकसान

या अपघाताची माहिती मिळताच पनवेल शहर पोलीस ठाण्याचे पोलीस निरीक्षक शिंदे, पोलीस उपनिरीक्षक गोविंद दाभाडे , पोहवा हनुमंत आहिरे आणि पोलिसांचे पथक घटनास्थळी त्वरित रवाना झाले. अपघातग्रस्त वाहनांना एका बाजूस केले. या अपघातात दोन्ही वाहनांचे मोठ्या प्रमाणात नुकसान झाले आहे. या अपघाताची नोंद पनवेल शहर पोलीस ठाण्यात करण्यात आली आहे.