मुंबईकरांनो सावधान! दिल्ली पेक्षाही हवेची गुणवत्ता घसरली, एयर क्वालिटी इंडेक्स कितीवर?
मुंबईतील हवा प्रदूषित झाली आहे, हवेत धूलिकण पसरल्याची माहिती समोर येत असून ही परिस्थिती काही दिवस अशीच राहणार असल्याने दिल्ली पेक्षाही हवा प्रदूषण मुंबईत दिसून येणार असल्याचा अंदाज आहे.
मुंबई : नवीन वर्षाच्या सुरुवातीपासूनच उत्तर भारतात थंडीची लाट आली आहे. त्याचा परिणाम मुंबईसह उपनगर आणि इतर जिल्ह्यात दिसून येत आहे. मुंबईतील हवामानाची स्थिती बघता थंडीचा जोर कायम आहे. दरम्यान, भारतीय हवामान खात्याने वर्तविलेल्या अंदाजानुसार आठवडाभर हा थंडीचा जोर कायम राहणार असून वायु प्रदूषण देखील वाढणार आहे. त्यातच दिल्ली पेक्षाही हवेतील प्रदूषण मुंबईत आढळून येण्याची शक्यता नाकारता येत नाहीये. मुंबईतील प्रदूषणाच्या पातळीत वाढ झाली असून हवेची गुणवत्ता ढासळत चालली आहे. एयर क्वालिटी इंडेक्स 300 अंकाच्या वर गेला आहे. सकाळच्या सत्रात देखील मुंबईच्या हवामानात मोठा बदल झालेला दिसून आला असून धुक्याची चादर मुंबईनगरीवर पडलेली दिसून आली आहे. आयएमडीच्या अंदाजानुसार असे हवामान आठवडाभर राहण्याची शक्यता असल्याने मुंबईत आठवडाभर असाच गारवा राहणार आहे.
उत्तरेकडून येणाऱ्या शीत लहरीमुळे मुंबईतील हवामानात देखील मोठा बदल झाला आहे. मध्य महाराष्ट्र, उत्तर महाराष्ट्रात आणि पश्चिम महाराष्ट्रात या थंडीचा प्रादुर्भाव अधिक जाणवत होता.
परंतु मुंबई सारख्या शहरात देखील थंडीचा जोर अधिकच वाढला असून हवेतील प्रदूषण देखील वाढले आहे, मुंबईसह उपनगरात धुकं दिसून येत असून सातत्याने हवेतील प्रदूषण वाढत आहे.
सफर संस्थेच्या माध्यमातून समोर आलेल्या आकडेवारीनुसार 300 अंकांच्या वर मुंबईचा एयर क्वालिटी इंडेक्स गेला असून ही पातळी अधिक गडद होण्याची देखील शक्यता नाकारता येत नाही.
मुंबईतील हवा प्रदूषित झाली आहे, हवेत धूलिकण पसरल्याची माहिती समोर येत असून ही परिस्थिती काही दिवस अशीच राहणार असल्याने दिल्ली पेक्षाही हवा प्रदूषण मुंबईत दिसून येणार असल्याचा अंदाज आहे.
एकूणच उत्तरेकडील राज्यात असलेल्या कडाक्याचा थंडीचा सामना महाराष्ट्रासह मुंबईला देखील करावा लागत आहे. थंडी, धुके यामुळे हवा प्रदूषण मोठ्या प्रमाणात झाले असून दिल्लीपेक्षाही मुंबईचे हवामान दूषित होण्याचा अंदाज वर्तविला जात आहे.