नागपूर मनपा निवडणूक, भाजपकडून इच्छुकांच्या मुलाखती, काँग्रेस-राष्ट्रवादीची स्थिती काय?
भाजपने विधानसभानिहाय निवडणुकीची आखणी केली आहे. माजी आमदार अनिल सोले हे पूर्व नागपुरात मुलाखती घेत आहेत. पूर्व नागपुरात शुक्रवारी इच्छुक उमेदवारांच्या मुलाखती घेण्यात आल्या.
नागपूर : ओबीसींना राजकीय आरक्षण (Political Reservation for OBCs) देण्यास सर्वोच्च न्यायालयाने नकार दिला. त्यामुळं नागपूर महापालिका निवडणुका ओबीसी आरक्षणाशिवाय होण्याची शक्यता वाढली आहे. नगरसेवकांचा कार्यकाळ चार मार्च रोजी संपला. त्यामुळं हे नगरसेवक आता माजी झाले. बहुतेक सर्वच राजकीय पक्ष निवडणुकीच्या मोडमध्ये आले आहेत. काँग्रेसने उमेदवारी अर्ज (Congress Candidate Application) देण्यास सुरुवात केली. बसपानेही त्यासाठी पुढाकार घेतला. आता भाजपने सरळ मुलाखती (BJP Interviews) सुरू केल्या आहेत. ज्या उमेदवारांना निवडणूक लढण्याची इच्छा आहे त्यांच्या मुलाखती घेणे सुरू केले आहे. आधी दक्षिण-पश्चिम भागात या मुलाखती घेण्यात आल्या. आता पूर्व नागपुरात मुलाखती घेतल्या जात आहेत.
पूर्व नागपुरात साडेतीनशे उमेदवार भाजपकडून इच्छुक
प्रभाग रचनेत काही बदल झालेत. आधी चार सदस्य एका प्रभागात होते. आता तीन सदस्य एका प्रभागात राहणार आहेत. त्यामुळं सक्षम उमेदवारांसाठी शोधाशोध सुरू झाली आहे. भाजपने विधानसभानिहाय निवडणुकीची आखणी केली आहे. माजी आमदार अनिल सोले हे पूर्व नागपुरात मुलाखती घेत आहेत. पूर्व नागपुरात शुक्रवारी इच्छुक उमेदवारांच्या मुलाखती घेण्यात आल्या. साडेतीनशेहून अधिक बूथ प्रमुखांनी उमेदवारी मागितल्याची माहिती आहे. त्यामुळं आता तिकीट कुणाला मिळते. नाराज उमेदवार दुसऱ्या पक्षांच्या तिकिटाची तयारी करण्याची शक्यता आहे. शिवाय काही जण अपक्ष लढण्याच्या तयारीत आहेत.
काँग्रेसची वेट अँड वॉचची भूमिका
मनपा निवडणुकीसाठी काँग्रेसने सुरुवातीलाच अर्ज वितरण सुरू केले. काँग्रेसची तिकीट हवी असल्यास आधी अर्ज घेऊन जा, असे आवाहन करण्यात आले. इच्छुक उमेदवार देवडिया भवनातून अर्ज आणत आहेत. शिवसेनाही उमेदवारांच्या मुलाखती घेत आहे. शिवसेनेचे काही जुने कार्यकर्ते नाराज आहेत. राष्ट्रवादीच्या गोटात मात्र, शांतता दिसून येत आहे. बसपा, आप, वंचित बहुजन आघाडी, इंडियन मुस्लीम लिग हे पक्षही निवडणुकीची तयारी करत आहेत.
