Video | मोदी- शाह यांनी लक्ष घालून कारवाईचा अतिरेक थांबवावा; भुजबळांचे थेट दिल्लीश्वरांना साकडे
छगन भुजबळ म्हणाले की, आम्ही सगळे एकत्रच आहोत. कुणावर कारवाई झाली तरी आम्ही एकत्र आहोत. यूपीएच्या बाहेर अनेक घटकपक्ष आहेत. बिगर भाजप राज्यातील नेत्यांनी एकत्र यायला हवे. यूपीएचे नेते खूप आहेत. त्यांनी पवारासाहेबांचा उपयोग कसा करायचा ठरवले पाहिजे.
नाशिकः भाजपच्या नेत्यांना नोटीस पाठवली की, राज्य सरकारकडून अत्याचार होतोय म्हणून कांगावा केला जातो. मात्र, आम्ही काही कुठे बोलले की थेट कारवाई होते. आता या प्रकरणात पंतप्रधान नरेंद्र मोदी आणि गृहमंत्री अमित शाह यांनी लक्ष घालावे. हा अतिरेक थांबवावा, असे आवाहन मंत्री छगन भुजबळ (Chhagan Bhujbal) यांनी केले. ते नाशिकमध्ये बोलत होते. काँग्रेस आणि नाना पटोले यांचे निकटवर्तीय म्हणून ओळखले जाणारे प्रसिद्ध वकील सतीश उके यांच्या घरी आज ईडीने धाड टाकली. उके यांचे सकाळपासून चौकशी सुरू होती. त्यानंतर आता ईडीने सतीश उके (Satish Uke) यांना ताब्यात घेतले आहे. सतीश उके हे नाना पटोले यांचे वकील आहेत. माजी मुख्यमंत्री देवेंद्र फडणवीस (Devendra Fadnavis) यांच्या सांगण्यानुसार ही सर्व कारवाई होत आहे, असा आरोप उके यांच्या कुटुंबीयांनी केलाय. विशेष म्हणजे लोहिया प्रकरण तसेच निमगडे हत्याकांडप्रकरणी उके हे वकील आहेत. या कारवाईवरून पुन्हा एकदा सरकार विरुद्ध विरोधक अशी खडाजंगी पाहायला मिळतेय. या साऱ्या प्रकरणाचा संदर्भ घेत भुजबळांनी हे आवाहन केले.
काय म्हणाले भुजबळ?
मंत्री छगन भुजबळ म्हणाले की, भाजपच्या नेत्यांना नोटीस पाठवली की, राज्य सरकारकडून अत्याचार होतोय म्हणून कांगावा केला जातो. मात्र, आम्ही काही कुठे बोलले की थेट कारवाई होते. त्यांच्याच पक्षातले हर्षवर्धन पाटील सारखे लोक सांगतात की, मानसिक त्रास आणि शारीरिक त्रास दिला जातोय. आता मतदानाच्या पेटीतून जनता त्यांचे मत मांडेल. भाजपच्या समजदार नेत्यांनी याचा विचार करावा, असा इशाराही भुजबळांनी दिला.
लोणीकरांच्या धमक्या सुरू…
भुजबळ म्हणाले की, भाजपचे नेते बबन लोणीकर महावितरण अधिकाऱ्यांना धमक्या देत आहेत. खरे तर विरोधी पक्षातील लोकांना नोटीस दिली, तरी हा अन्याय आहे. आता या प्रकरणात स्वतः पंतप्रधान नरेंद्र मोदी आणि अमित शाह यांनी लक्ष घालावे, हा अतिरेक थांबवावा, अशी मागणी त्यांनी यावेळी केली.
आम्ही सगळे एकत्रच…
छगन भुजबळ म्हणाले की, आम्ही सगळे एकत्रच आहोत. कुणावर कारवाई झाली तरी आम्ही एकत्र आहोत. यूपीएच्या बाहेर अनेक घटकपक्ष आहेत. बिगर भाजप राज्यातील नेत्यांनी एकत्र यायला हवे. यूपीएचे नेते खूप आहेत. त्यांनी पवारासाहेबांचा उपयोग कसा करायचा ठरवले पाहिजे, असे आवाहनही त्यांनी यावेळी केले.
