मोबाईलने जीव घेतला! पाचव्या मजल्यावर असताना फोन आला, तिने तो रिसिव्ह केला पण…

फोन उचलण्याच्या नादात तरुणी पाचव्या मजल्यावरुन पडली

Image Credit source: TV9

पुणे / अभिजीत पोते : नवीन इमारतीची पाहणी करायला गेलेल्या तरुणीचा पाचव्या मजल्यावरुन पडून मृत्यू झाल्याची धक्कादायक घटना पुण्यात घडली आहे. या घटनेमुळे परिसरात एकच खळबळ माजली आहे. इमारतीची पाहणी करत असताना तरुणीला फोन आला. तरुणी फोन घेण्याच्या नादात गडबडीत पाचव्या मजल्यावरुन उतरताना तोल गेला आणि ती खाली पडली. तिला तात्काळ रुग्णालयात दाखल करण्यात आले, मात्र उपचारादरम्यान तिचा मृत्यू झाला. पुण्यातील सासवड येथे ही धक्कादायक घटना घडली. या घटनेमुळे जगताप कुटुंबीयांवर दुःखाचा डोंगर कोसळला आहे.

काय घडले नेमके?

पुण्यातील सासवड परिसरात सुनील जगताप या बांधकाम व्यावसायिकाच्या नवीन प्रोजेक्टचे काम सुरु आहे. जगताप यांच्या नवीन आठ मजली इमारतीचे काम सुरु आहे. जगताप कुटुंबीय 2 एप्रिल रोजी आपल्या नवीन बांधकामाची पाहणी करण्यासाठी गेले होते.

पाहणी करत सर्वजम पाचव्या मजल्यावर पोहचले. पाचव्या मजल्यावर पाहणी करत असतानाच जगताप यांची 21 वर्षाची मुलगी अनुष्का हिला फोन आला. फोन घेण्याच्या नादात पाचव्या मजल्यावरुन उतरताना तोल गेला आणि अनुष्का पाचव्या मजल्यावरुन थेट खाली कोसळली.

उपचारादरम्यान तरुणीचा मृत्यू

या अपघातात गंभीर जखमी अनुष्काला तात्काळ खाजगी रुग्णालयात उपचारासाठी दाखल केले. मात्र उपचारादरम्यान अखेर तिची प्राणज्योत मालवली. या घटनेमुळे एकच खळबळ उडाली आहे. तरुण मुलीच्या मृत्यूमुळे जगताप कुटुंबीयांवर दुःखाचा डोंगर कोसळला आहे.