मोठा राडा, पुण्यातील आंबेगावात शरद पवार आणि अजित पवार गटाचे कार्यकर्ते एकमेकांना भिडले
पुण्यातील आंबेगावत राष्ट्रवादी काँग्रेसच्या दोन्ही गटात मोठा राडा झाला. जवळपास दोन तास गोंधळ सुरु होता. तसेच मंत्री दिलीप वळसे पाटील यांच्यासमोर हा सगळा प्रकार घडत होता. दिलीप वळसे पाटील सर्वांना शांततेचं आवाहन करत होते. पण दोन तास गदारोळ सुरु राहीला.
पुण्यातील आंबेगाव तालुक्यात राष्ट्रवादी शरद पवार गटाचे आणि उपमुख्यमंत्री अजित पवार यांच्या गटाचे कार्यकर्ते एकमेकांना भिडले. सहकार मंत्री दिलीप वळसे पाटील यांच्या समोरच हा सगळा राडा झाला. आंबेगाव तालुक्यातील भीमाशंकर साखर कारखान्याच्या वार्षिक सर्व साधारण सभेत दोन तास गदारोळ सुरू होता. अजित पवार गटाचे मंत्री वळसे पाटील यांच्या विरोधात विधानसभा लढण्यास इच्छुक असणारे शरद पवार गटाचे देवदत्त निकम या दोघांचे हे समर्थक होते. “आम्हाला बसू दिलं नाही, मंचावर येऊ दिलं नाही, बैठकीत वळसे पाटलांनी स्वतःचा प्रचार केला, हे सगळं घडवून आणण्यासाठी ते गुंड घेऊन आले”, असा आरोप देवदत्त निकम यांनी केला. याच मुद्द्यावरुन दोन्ही गटात तुफान राडा झाला.
दिलीप वळसे पाटील आणि देवदत्त निकम यांचे कार्यकर्ते एकमेकांच्या अंगावर धावून गेले, खुर्च्या नाचवत हीनवू लागले. मंत्री वळसे पाटलांनी शांततेचं आवाहन केलं. मात्र वेगवेगळ्या कारणांवरून राडा रंगतच राहिला. शेवटी पोलिसांनी मध्यस्थी केली अन् देवदत्त निकमांना बाहेर जाण्याची विनंती करण्यात आली. मग देवदत्त निकमांनी आम्हाला सभेतून हकलण्यासाठी गुंड आणल्याचा आरोप केला. मात्र हे सगळे आरोप अजित पवार गटाने फेटाळले आहेत.
अजित पवार गटाची भूमिका काय?
विनाकारण राजकीय रंग देऊन स्वतःची पोळी भाजण्याचे प्रयत्न निकामांनी केल्याचा पलटवार अजित पवार गटाकडून करण्यात आला. देशातील सर्वोत्तम मानल्या जाणाऱ्या भीमाशंकर कारखान्याच्या वार्षिक बैठकीत हा गदारोळ करून काय साध्य केलं? उलट कारखाना बदनाम करण्याचे प्रयत्न केले, असा पलटवार अजित पवार गटाचे नेते शिवाजी आढळरावांनी केला.