Pune NCP Agitation : ‘कमळाबाई’ची आरती करून राष्ट्रवादीनं केला वाढलेल्या महागाईचा निषेध; पुण्यातल्या शनिपार चौकात आंदोलन

महागाईविरोधात राष्ट्रवादीचे शनिपार चौक, पुणे येथे आंदोलन

Image Credit source: tv9

पुणे : वाढलेल्या महागाईच्या विरोधात राष्ट्रवादी आक्रमक झाली असून पुण्यात पक्षातर्फे (Pune NCP Agitation) आंदोलन करण्यात येत आहे. यावेळी कमळाबाईची तसेच महागाईची देवी अशी आरती करण्यात आली. भ्रष्टाचाराचा धिक्कार असो अशी घोषणाबाजी यावेळी करण्यात आली. देशात पेट्रोल-डिझेल दरवाढ (Petrol diesel price hike) सुरूच आहे. तर गॅस सिलिंडरच्या किंमतीतही सातत्याने वाढ होत आहे. त्यामुळे सर्वसामान्य जनता त्रस्त झाली आहे. रोजच वाढणाऱ्या इंधनाच्या दरामुळे जगायचे कसे, हा प्रश्न सर्वसामान्यांना पडला आहे. केंद्र सरकारला मात्र याचे काहीच देणेघेणे नाही. नागरिकांच्या समस्या जाणून घेण्यासही त्यांना कोणताही रस नाही. तर दुसरीकडे देशात फारशी महागाई (Inflation) नसल्याचे वक्तव्य केंद्रीय अर्थमंत्री निर्मला सीतारामन यांनी केले होते. अशी वक्तव्ये म्हणजे सर्वसामान्यांच्या जखमेवर मीठ चोळण्याचाच प्रकार आहे. या सर्वांचा निषेध म्हणून शनिपार चौकात हे आंदोलन करण्यात आले.

भाजपाचा झेंडा लावला उलटा

महागाईच्या मुद्द्यावरून सरकारचे लक्ष वेधण्यासाठी राष्ट्रवादीच्या कार्यकर्त्यांनी शनिपार चौकातील मारुती मंदिरासमोर हे आंदोलन केले. यावेळी भाजपाचा झेंडा उलटा लावत कमळाबाई, महागाईची देवी अशा आरत्या करण्यात आल्या. भष्टाचाराचा निषेधही करण्यात आला. या आंदोलनात खासदार सुप्रिया सुळे, राष्ट्रवादी शहराध्यक्ष प्रशांत जगताप, अंकुश काकडे यांच्यासह मोठ्या प्रमाणात कार्यकर्ते जमले होते. याआधीही राष्ट्रवादीने गुडलक चौकात 29 एप्रिलला आंदोलन केले होते. यात भोंगे लावून, नरेंद्र मोदींचे जुने भाषण ऐकवण्यात आले होते. महागाई तसेच पेट्रोल-डिझेल दरवाढीचा विरोध करण्यात आला होता.

शरद पवारांनीही केली होती टीका

पेट्रोल-डिझेलचे भाव सातत्याने वाढत आहेत. ते सतत वाढल्यास त्याचा परिणाम फक्त वाहनचालकांना होत नाही, तर भाजीपाला तसेच इतर जीवनावश्यक वस्तूंच्या किंमतीही त्यामुळे वाढतात. त्यामुळे इंधनाच्या किंमती कमी होणे गरजेचे आहे. मात्र केंद्रातले सरकार सामान्यांच्या या समस्यांकडे ढुंकूनही पाहायला तयार नाही, असा टोला काल शरद पवार यांनी केंद्र सरकारला लगावला होता.