Pune accident : कारच्या धडकेत ऑटोरिक्षाचा चुराडा, सीएनजीचा सिलिंडरही फुटला; गोऱ्हे खुर्दमधल्या अपघातात रिक्षाचालक गंभीर
हवेली पोलीस आणि अग्निशामक दल घटनास्थळी दाखल झाले आणि तातडीने जखमी व्यक्तीस खासगी रुग्णवाहिकेने उपचारांसाठी पाठविण्यात आले. जखमी रिक्षाचालकाची प्रकृती गंभीर असून त्याच्यावर उपचार सध्या सुरू आहेत.
पुणे : पानशेत रस्त्यावरील गोऱ्हे खुर्द (Gorhe Khurd) गावच्या हद्दीत व्यंकटेश्वरा शाळेजवळ रिक्षा आणि कारची समोरासमोर जोरदार धडक झाली. या अपघातात रिक्षाचालक नारायण प्रभाकर दारवटकर (रा. कोंडगाव, ता. वेल्हे) हा गंभीर जखमी झाला आहे. रात्री साडेअकरा वाजण्याच्या सुमारास हा अपघात झाला (Pune accident) असून जखमी व्यक्तीस उपचारांसाठी खासगी रुग्णालयात दाखल करण्यात आले आहे. अपघाताची तीव्रता एवढी होती, की यात रिक्षाचा अक्षरशः चुराडा झाला आहे. अपघाताचा आवाज ऐकून स्थानिक रहिवासी शशिकांत किवळे आणि इतर तरूण मदतीसाठी धावले. रिक्षाची सीएनजीची टाकी फुटल्याने (CNG cylinder blast) गॅस गळती सुरू होती. परिस्थितीचे गांभीर्य ओळखून शशिकांत किवळे यांनी हवेली पोलीस आणि पीएमआरडीएच्या अग्निशामक दलाला माहिती कळवली.
रिक्षाचालकाची प्रकृती गंभीर
हवेली पोलीस आणि अग्निशामक दल घटनास्थळी दाखल झाले आणि तातडीने जखमी व्यक्तीस खासगी रुग्णवाहिकेने उपचारांसाठी पाठविण्यात आले. जखमी रिक्षाचालकाची प्रकृती गंभीर असून त्याच्यावर उपचार सध्या सुरू आहेत. रिक्षा आणि कारची धडक, सीएनजीच्या टाकीतून गळती आणि त्यानंतर सीएनजीचा स्फोट यामुळे रिक्षाचालक यात गंभीर जखमी झाला आहे. पुढील तपास पोलीस करीत आहेत.
वारंवार होताहेत अपघात
चार महिन्यांपूर्वी गोऱ्हे खुर्द येथील शौर्य हॉटेलच्या समोर एक अपघात झाला होता. वेगात असलेली कार उलटून यामध्ये भूषण रोहिदास किवळे (वय 25 रा. नांदोशी, ता. हवेली) या तरुणाचा मृत्यू झाला. तर इतर तिघे गंभीर जखमी झाले होते. तर मे महिन्यात एक अपघात झाला होता. एक कार खड्डयात पडून झालेल्या अपघातात तरुणाचा मृत्यू झाला. दोन जण जखमी झाले होते. सकाळी साडेसात वाजता ही घटना घडली होती. नितीन घाणेकर (वय 22, रा. राजेंद्रनगर, तेंडुलकर पार्क, नवी पेठ) असे तरुणाचे नाव होते तर शंतनू वडनेरे (वय 22 रा. कमला नेहरू पार्क समोर), शुभम ढेबे (रा. 24, रा. सिंहगड रोड, विठ्ठलवाडी) असे दोघेजण जखमी झाले होते.
