Aurangabad Central Constituency : चौरंगी लढतीत कोण साधेल सुवर्ण ‘मध्य’; औरंगाबाद मध्य मतदारसंघात मत विभाजनाचा पुन्हा MIM ला होणार फायदा? की पुरून उरेल सेना

औरंगाबाद मध्य मध्ये मतविभाजानाचा फायदा कुणाला?

औरंगाबाद मध्य मतदार संघाने ऑल इंडिया मजलिस-ए-इत्तेहादुल मुस्लिमीन- MIM साठी दरवाजे किलकिले केले. इम्तियाज जलील यांच्या माध्यमातून पहिला आमदार मिळाला, पहिला खासदार दिला. कधी काळी शिवसेनेचा बालेकिल्ला असलेल्या मराठवाड्याची राजधानी छत्रपती संभाजीनगरमध्ये राजकारणाने अशी कूस बदलली की प्रस्थापित पक्षांचे धाबे दणाणले. त्यानंतर एमआयएमने दिन दुगणी, रात चौगुणी प्रगती साधली. महापालिकेपासून जवळपास सर्वच स्थानिक स्वराज्य संस्थांमध्ये पक्षाच्या सदस्यांची लक्षणीय संख्या दिसली. आज त्याच औरंगाबाद मध्य मतदारसंघात (Aurangabad Central Constituency) 2014 ची स्थिती दिसत आहे. या मतदारसंघात ट्रँगल तयार होताना दिसत आहे. दहा वर्षांपूर्वी मत विभाजनात एमआयएमचा आमदार पहिल्यांदा सुरूंग लावून निवडून येण्यात यशस्वी झाला होता. तशीच काहीशी आता परिस्थिती तयार झाली आहे.

मत विभाजनाचा एमआयएमला फायदा

2014 मधील विधानसभा निवडणुकीत एमआयएमला मत विभाजनाचा फायदा झाला. मुस्लीम आणि दलित मतांची मोट बांधत इम्तियाज जलील यांच्या सारख्या नवख्या पत्रकाराने या मतदारसंघात विजयश्री खेचून आणला होता. आता दहा वर्षानंतर ही तशीच परिस्थिती तयार होत आहे. या राजकीय कुरूक्षेत्रात शिवसेनेच्या शिंदे सेनेने प्रदीप जैस्वाल यांची उमेदवारी जाहीर केली. त्यानंतर उद्धव सेनेने किशनचंद तनवाणी यांचे नाव जाहीर केले. महाविकास आघाडीत प्रवेश मिळेल, या आशेवर एमआयएम होती. पण त्यांना कोणताही निरोप आला नाही. त्यानंतर एमआयएमने नासिर सिद्दिकी यांना पुन्हा या मतदारसंघातून उतरवले. 2019 मध्ये सिद्दिकी यांनी दुसऱ्या क्रमांकावर धडक दिली होती. त्यामुळे दोन सेनेतील मत विभाजनाचा एमआयएमला मोठा फायदा होईल असा अंदाज बांधण्यात येत आहे.

मतांचे गणित काय?

औरंगाबाद मध्य मतदारसंघात एकूण 3 लाख 66 हजार 435 मतदार आहेत. या मतदारसंघात हिंदू मतदान 45 टक्क्यांच्या घरात आहे. तर मुस्लीम मतदार हे 38 टक्के इतके आहेत. दलित समाजाचा मतांचा आकडा 15 टक्क्यांच्या घरात जातो. तर इतर 3 टक्क्यांच्या घरात मतदार आहेत. मागील निवडणुकीत अखंड शिवसेना-भाजप युतीचे उमेदवार प्रदीप जैस्वाल यांना 42 टक्के मतदान झाले होते. तर एमआयएमचे नासेर सिद्दीकी यांना 35 टक्के मत मिळाली होती. वंचितचे उमेदवार अमित भुईगळ यांना 14 टक्के मतं मिळाली होती.

यावेळी भाजप-शिंदे सेना आणि उद्धव सेना असे दोन उमेदवार मैदानात आहेत. तर एमआयएमच्या पाठीमागे दलित मते किती आहेत, हे निकालानंतर समोर येईल. तर वंचितने मध्य विधानसभा मतदारसंघासाठी मोहम्मद जावेद मोहम्मद इसहाक यांच्या नावाची घोषणा केली आहे. इतरही अनेक मुस्लीम उमेदवार मैदानात आहेत. त्यामुळे एमआयएमची मतं फुटण्याची पण चर्चा आहे. अर्थात विस्तृत चित्र पाहता सेनेच्या दोन्ही उमेदवारांना या मतदारसंघात नेटाने लढाई करावी लागणार हे स्पष्टच आहे.

मग इम्तियाज जलील लढणार कोठून?

माजी खासदार इम्तियाज जलील यांनी औरंगाबाद मध्य, औरंगाबाद पूर्व आणि वैजापूर विधानसभा मतदारसंघासाठी अर्ज खरेदी केले आहे. तर नांदेड लोकसभा पोटनिवडणुकीतही ते नशीब आजमावणार आहेत. आता नासेर सिद्दिकी यांना मध्य मधून उमेदवारी दिल्याने जलील यांच्यासमोर औरंगाबाद पूर्व आणि वैजापूर हे मतदारसंघ उरले आहेत.