इस्लामपूरमधील कुटुंबाभोवती ‘कोरोना’चा फास घट्ट, लहान बाळालाही लागण

सांगली : सांगलीतील इस्लामपूरमधील कुटुंबाभोवती पडलेला ‘कोरोना’चा फास आणखी घट्ट होताना दिसत आहे. त्याच कुटुंबातील लहान बाळही कोरोनाबाधित झाल्याचं समोर आलं आहे. त्यामुळे एकाच कुटुंबातील कोरोनाबाधितांचा वाढताच पाहायला मिळत आहे. (Islampur Family Corona Update)

सांगली जिल्ह्यात आणखी एकाचा रिपोर्ट कोरोना पॉझिटिव्ह आल्यामुळे कोरोनाग्रस्तांची संख्या 24 वर पोहोचली आहे. सांगली जिल्ह्यातील 24 आणि कोल्हापूर जिल्ह्यातील एक अशा 25 रुग्णांवर मिरजेत उपचार सुरु आहेत.

महत्त्वाचं म्हणजे इस्लामपुरात जे नवे रुग्ण आढळत आहेत, ते पूर्वीच्याच्या चार कोरोनाबाधितांच्या संपर्कात आले होते. हे सर्व एकाच कुटुंबातील आहेत. ज्या कुटुंबातील चौघांना लागण झाली होती, त्यांचं कुटुंब 35 जणांचं आहे.

या कुटुंबातील चौघांना कोरोनाची लागण झाल्याचं आधी समोर आलं. हे चौघे सौदी अरेबियाहून हज यात्रा करुन आले होते. त्यानंतर त्यांच्या कुटुंबातील सर्वांची चाचणी केली असता, 25 मार्चला आणखी पाच जण कोरोना पॉझिटिव्ह आले होते. त्यांच्या संपर्कातील आणखी 12 जणांची चाचणी केली असता, त्यांचे रिपोर्टही पॉझिटिव्ह आले आहेत.

महत्त्वाचं म्हणजे या कुटुंबाने एका लग्न समारंभालाही हजेरी लावली होती. या कुटुंबाच्या संपर्कात आलेल्या 27 जणांना आधी क्वारंटाईन करण्यात आलं होतं. इस्लामपूर शहरातील 337 नागरिक कोरोनाबाधित कुटुंबियांच्या संपर्कात आल्याची धक्कादायक माहिती पुढे आली. (Islampur Family Corona Update)