सांगलीचा 16 लाखांचा बोकड चोरीला, अलिशान कारमधून पळवला!
सांगलीत एका आलिशान चारचाकी गाडीतून हा बकरा लंपास करण्यात आल्याने खळबळ माजली आहे
सांगली : सांगली जिल्ह्यातील आटपाडीतील प्रसिद्ध उत्तरेश्वर देवाच्या कार्तिक पौर्णिमेनिमित्त आयोजित जनावरांच्या बाजारात दीड कोटी रुपये दर असलेला मोदी बकरा आणि त्याचाच वंश (Modi Bakra Sangli) असलेल्या 16 लाखाचा बोकड चर्चेचा विषय ठरला होता. त्याला आटपाडीच्या बाजारात 70 लाख रुपये इतक्या प्रचंड दराने मागणी झाली. पण तो त्यांनी विकला नाही. मात्र, त्यातील 16 लाखांचा बोकड आटपाडीच्या सोमनाथ जाधव यांनी विकत घेतला. आता हाच बोकड चोरी गेला आहे. शनिवारी पहाटे चोरांनी गोठ्यात शिरुन त्याला पळवलं. विशेष म्हणजे एका आलिशान चारचाकी गाडीतून हा बोकड लंपास करण्यात आल्याने खळबळ माजली आहे. (Sangli’s goat worth Rs 16 lakh stolen)
मोदी बकऱ्याची राज्यभर चर्चा
सोलापुरातल्या सांगोल्याच्या बाबूराव मेटकरींच्या मोदी बोकडाची राज्यभर चर्चा झाली. या बोकडावर आटपाडीच्या बाजारात तब्बल 70 लाखांची बोली लागली होती. मात्र मेटकरींना तो दीड कोटींच्या खाली विकायचा नव्हता. त्यामुळं हा व्यवहार होऊ शकला नाही. याच बाजारात त्यांनी मोदी बोकडाचं बीज असलेल्या दुसऱ्या बोकडालाही आणलं होतं, हा बोकड त्यांनी 16 लाखांना विकला. जो आटपाडीच्या सोमनाथ जाधव यांनी विकत घेतला.
महाराष्ट्र आणि कर्नाटक राज्यात आटपाडी कार्तिक पौर्णिमेची यात्रा प्रसिद्ध आहे. येथे पशुपालक , मेंढपाळ मोठ्या संख्येने येत असतात. चालू वर्षी कोरोनामुळे यात्रा रद्द झाली. त्याऐवजी फक्त जनावरांचा बाजार रविवारी आणि सोमवारी भरविण्यात येतो. गेल्या महिन्यात मोठ्या उत्साहात हौशी मेंढपाळ पशूपालक यांनी आपल्या जनावरांसह हजेरी लावली होती. तिथंच हे दोन्ही बोकड पाहायला मिळाले होते.
बोकडासाठी 16 लाखांची किंमत काही कमी नाही. मात्र, जाधवांनी मोठ्या हौशीनं हा बोकड घेतला. मात्र, त्याच्यावर चोरट्यांची वाईट नजर पडली. आता हाच बोकड शोधण्याचं मोठं आव्हान पोलिसांसमोर असणार आहे. बोकड शोधून देणाऱ्यांसाठी जाधव यांनी बक्षीसही ठेवल्याची माहिती आहे.
संबंधित बातम्या
