निवडणूक आयोग आमच्या बॅगा तपासतो आणि इकडे शेपूट घालतो; संजय राऊत यांचा हल्लाबोल
विनोद तावडे आणि क्षितिज ठाकूर हे एकमेकांशी वाद घालताना दिसत आहेत. यावर कॅप्शन देताना संजय राऊतांनी भाजपचा खेळ खल्लास! असे म्हटले आहे.
महाराष्ट्रात विधानसभा निवडणुकीसाठी उद्या मतदान पार पडत आहे. त्यातच आता नालासोपाऱ्यात मोठा राडा झाला आहे. भाजपचे नेते विनोद तावडे यांच्यावर पैसे वाटप केल्याचा आरोप करण्यात आला आहे. यामुळे बहुजन विकास आघाडीच्या कार्यकर्त्यांनी विनोद तावडेंना घेरलं आहे. विनोद तावडे यांच्यासह भाजपचे नालासोपारा मतदारसंघाचे उमेदवार राजन नाईक यांना विवांता हॉटेलमध्ये घेरलं आहे. यामुळे सध्या भाजप आणि बहुजन विकास आघाडी या दोन्ही गटात तुफान राडा पाहायला मिळत आहे. आता यावरुन ठाकरे गटाचे खासदार संजय राऊत यांनी प्रतिक्रिया दिली आहे.
ठाकरे गटाचे संजय राऊत यांनी ट्वीटरवर एक व्हिडीओ शेअर केला आहे. या व्हिडीओत विनोद तावडे आणि क्षितिज ठाकूर हे एकमेकांशी वाद घालताना दिसत आहेत. यावर कॅप्शन देताना संजय राऊतांनी भाजपचा खेळ खल्लास! असे म्हटले आहे.
भाजपचा खेळ खल्लास! जे काम निवडणूक आयोगानेच करायला हवे होते ते काम ठाकुरांनी केले! निवडणूक आयोग आमच्या बॅगा तपासतो आणि इकडे शेपूट घालतो!, अशी प्रतिक्रिया संजय राऊतांनी दिली.
भाजपचा खेळ खल्लास!
जे काम निवडणूक आयोगानेच करायला हवे होते ते काम ठाकुरानी केले!
निवडणूक आयोग आमच्या बॅगा तपासतो आणि इकडे शेपूट घालतो! pic.twitter.com/BcGKRVSOkj— Sanjay Raut (@rautsanjay61) November 19, 2024
“भाजपने कितीही लपवायचा प्रयत्न केला तरी नालासोपारा विरारमध्ये जे घडलं ते कॅमेऱ्यासमोर आहे. खुलासे कसले करता. भाजपचा खरा चेहरा उघड झाला, त्यांचा निवडणुकीतील खेळ संपला. विनोद तावडे हे पक्षाचे राष्ट्रीय महासचिव आहे. पक्षाच्या राष्ट्रीय महासचिवाकडे पाच कोटी रुपये पकडण्यात आले. बहुजन विकास आघाडीचे लोकं घुसले. त्यांनी पैसे जप्त केले. पैसे फेकले तोंडावर. त्यांनी तावडेंना कोंडून ठेवलं. यावर भाजप काय खुलासा करणार आहे”, असे संजय राऊत यांनी पत्रकार परिषदेत म्हटले.
नेमकं काय घडलं?
विरारमध्ये आज दुपारी १.३० च्या सुमारास मोठा राडा झाला. भाजप नेते विनोद तावडे यांनी विरारमध्ये पैसे वाटल्याचा आरोप बहुजन विकास आघाडीने केला. यामुळे विरार पूर्वमधील विवांत हॉटेलमध्ये बविआ-भाजप कार्यकर्त्यांमध्ये जोरदार राडा झाला. याचे अनेक व्हिडीओही व्हायरल झाले. यावेळी बविआच्या कार्यकर्त्यांनी विनोद तावडे यांना घेरले.
विरार पूर्व भागातील मनोरीपाडा येथील विवांत हॉटेलमध्ये हा सर्व राडा गेल्या तीन तासांपासून सुरु आहे. यावेळी भाजपचे स्थानिक उमेदवार राजन नाईक आणि काही पदाधिकारीही उपस्थित होते. विनोद तावडे हे या पदाधिकाऱ्यांना मतदारांना वाटण्यासाठी 5 कोटी रुपये घेऊन आले होते, असा आरोप बहुजन विकास आघाडीने केला. विनोद तावडे ज्या विवांत हॉटेलमध्ये थांबले होते, तिथे हितेंद्र ठाकूर यांचे सुपुत्र क्षितिज ठाकूर आणि त्यांच्या कार्यकर्त्यांनी धाड टाकली. बविआच्या कार्यकर्त्यांनी विनोद तावडे यांना घेरले. त्यांच्याकडे काही रक्कमही सापडली. यावेळी बविआ आणि भाजप कार्यकर्त्यांमध्ये बाचाबाची झाली.
