2023 चा राज्य शासनाचा गानसम्राज्ञी लता मंगेशकर पुरस्कार ज्येष्ठ गायक सुरेश वाडकर यांना जाहीर
यंदा पुरस्कारांच्या रकमेत मोठी वाढ केली आहे. गानसम्राज्ञी लता मंगेशकर पुरस्कार, संगीताचार्य अण्णासाहेब किर्लोस्कर संगीत रंगभूमी जीवनगौरव पुरस्कार, नटवर्य प्रभाकर पंणशीकर रंगभूमी जीवनगौरव पुरस्कार, भारतरत्न पंडित भीमसेन जोशी शास्त्रीय संगीत जीवनगौरव पुरस्कार या पुरस्कारांची रक्कम पाच लक्ष रुपये होती, ती आता दहा लाख रुपये केली आहे. तसेच राज्य सांस्कृतिक पुरस्काराची जी एक लाखाची रक्कम होती ती रक्कम तीन लाखाची करण्यात येत आहे अशीही घोषणा सांस्कृतिक कार्यमंत्री सुधीर मुनगंटीवार यांनी केली आहे.
मुंबई | 11 नोव्हेंबर 2023 : राज्य शासनाच्या सांस्कृतिक कार्य विभागामार्फत प्रदान करण्यात येणाऱ्या विविध पुरस्कारांची घोषणा करण्यात आली आहे.
साल 2023 चा गानसम्राज्ञी लता मंगेशकर पुरस्कार ज्येष्ठ गायक सुरेश वाडकर यांना जाहीर झाला आहे. सांस्कृतिक कार्य मंत्री सुधीर मुनगंटीवार यांनी शनिवारी ही घोषणा केली आहे. गान सम्राज्ञी लता मंगेशकर पुरस्कार, नटवर्य प्रभाकर पणशीकर रंगभूमी जीवनगौरव पुरस्कार, संगीताचार्य अण्णासाहेब किर्लोस्कर संगीत रंगभूमी जीवन गौरव पुरस्कार, भारतरत्न पंडित भीमसेन जोशी शास्रीय संगीत जीवन गौरव पुरस्कार, राज्य सांस्कृतिक पुरस्कार सांस्कृतिक कार्य संचालनालयामार्फत दरवर्षी देण्यात येतात. यंदा साल 2022 आणि 2023 चे पुरस्कार जाहीर केले आहेत. जीवनगौरव पुरस्कारांच्या रकमेत दुप्पट वाढ करण्यात आली आहे. तर राज्य सांस्कृतिक पुरस्काराची रक्कम तिप्पट करण्यात आली आहे.
जीवन गौरव पुरस्कारांची घोषणा
भारतरत्न पंडित भीमसेन जोशी शास्त्रीय संगीत जीवन गौरव पुरस्कार 2022 साठी पं. उल्हास कशाळकर यांना तर, 2023 च्या पुरस्कार पं. शशिकांत (नाना) श्रीधर मुळ्ये यांना जाहीर झाला आहे. नटवर्य प्रभाकर पणशीकर रंगभूमी जीवन गौरव पुरस्कार 2022 हा सुहासिनी देशपांडे यांना तर 2023 साठी पुरस्कार अशोक समेळ यांना घोषित झाला आहे. संगीताचार्य अण्णासाहेब किर्लोस्कर संगीत रंगभूमी जीवनगौरव 2022 चा पुरस्कार नयना आपटे यांना तर 2023 चा पुरस्कार पं. मकरंद कुंडले यांना जाहीर झाला आहे.
राज्य सांस्कृतिक पुरस्कार जाहीर
राज्य सांस्कृतिक पुरस्कार 2022 आणि 2023 चीही घोषणा झाली आहे. राज्य सांस्कृतिक पुरस्कारांमध्ये एकूण 12 वर्गवारी असून, यामधील प्रत्येक वर्गवारी मध्ये दोन वर्षाचे दोन पुरस्कार जाहीर झाले आहेत. नाटक या विभागासाठी 2022 चा पुरस्कार वंदना गुप्ते यांना तर 2023 चा पुरस्कार ज्योती सुभाष यांना जाहीर झाला आहे. उपशास्त्रीय संगीत वर्गवारीमध्ये 2022 चा पुरस्कार मोरेश्वर निस्ताने यांना तर 2023 चा पुरस्कार ऋषिकेश बोडस यांना जाहीर झाला आहे. कंठ संगीत प्रकारातील 2022 चा पुरस्कार अपर्णा मयेकर यांना तर 2023 चा पुरस्कार रघुनंदन पणशीकर यांना जाहीर झाला आहे.
लोककला क्षेत्रातील 2022 चा पुरस्कार हिरालाल रामचंद्र सहारे यांना तर 2023 चा पुरस्कार कीर्तनकार भाऊराव थुटे महाराज यांना जाहीर झाला आहे. शाहीरी क्षेत्रातील 2022 चा पुरस्कार जयंत अभंगा रणदिवे यांना तर, 2023 चा पुरस्कार राजू राऊत यांना घोषित झाला आहे. नृत्य वर्गवारीतील 2022 चा पुरस्कार लता सुरेंद्र यांना तर 2023 साठीचा सदानंद राणे यांना जाहीर झाला आहे. चित्रपट क्षेत्रासाठी 2022 चा पुरस्कार चेतन दळवी यांना तर 2023 चा पुरस्कार निशिगंधा वाड यांना घोषित झाला आहे.
कीर्तन आणि इतर पुरस्कार
कीर्तन प्रबोधन क्षेत्रातील 2022 चा पुरस्कार संत साहित्यिक आणि लेखिका प्राची गडकरी यांना तर 2023 चा पुरस्कार अमृत महाराज जोशी यांना जाहीर झाला आहे.
वाद्य संगीत क्षेत्रातील 2022 चा पुरस्कार पं. अनंत केमकर यांना तर 2023 साठीचा शशिकांत सुरेश भोसले यांना जाहीर झाला आहे. कलादान या प्रकारासाठी 2022 साठीचा पुरस्कार संगीता राजेंद्र टेकाडे यांना तर, 2023 साठीचा पुरस्कार यशवंत रघुनाथ तेंडोलकर यांना जाहीर केला आहे. तमाशा वर्गवारीतील राज्य सांस्कृतिक पुरस्कार 2022 बुढ्ढणभाई बेपारी (वेल्हेकर) यांना तर, 2023 चा पुरस्कार उमाजी खुडे यांना घोषीत झाला आहे. आदिवासी गिरीजन वर्गवारीत 2022 साठी भिकल्याजी धाकल्या धिंडा तर 2023 साठी सुरेश नाना रणसिंग यांची निवड झाली आहे.