जगातलं सर्वात लांब रिव्हर क्रूज, 51 दिवसांचा आलिशान प्रवास,  ‘गंगा विलास’चं उद्घाटन आज PM मोदी यांच्या हस्ते,  वाचा सविस्तर..

Image Credit source: social media

नवी दिल्लीः पंतप्रधान नरेंद्र मोदी (PM Narendra Modi) आज जगातील सर्वात लांबीच्या क्रूजला हिरवा झेंडा दाखवणार आहेत. फाइव्ह स्टार हॉटेलच्या सुविधा असलेल्या या क्रूजचं नाव गंगाविलास (Gangavilas)आहे. वाराणसी येथून गंगाविलास क्रूजचा प्रवास आज सुरु होईल. वाराणसीतील (Varanasi) रविदास घाट येथून पुढे बिहार, बंगालच्या मार्गाने हे क्रूज बांग्लादेश, त्यानंतर आसाममधील डिब्रूगढला पोहोचेल. पंतप्रधान नरेंद्र मोदी आज व्हर्चुअल पद्धतीने या क्रूजचं उद्घाटन करतील.

क्रूजची वैशिष्ट्य काय?

•  गंगासागर क्रूज तब्बल 51 दिवसांचा प्रवास करणार आहे. भारत आणि बांग्लादेशमधील 27 रिव्हर सिस्टिम आणि सात नद्यांतून हे जहाज प्रवास करेल.
• गंगा, भागीरथी, मेघना, हुबळी, जमुना, पद्मा आणि ब्रह्मपुत्रा या सात नद्यांचा समावेश यात आहे.
•  जहाजाच्या या प्रवासात 50 पर्यटन स्थळ जोडले जातील.
• हे जहाज 62.5 मीटर लांब, 12.8 मीटर रुंद आणि 1.35 मीटर खोल आहे.
•  स्वदेशी तंत्रज्ञान आणि फर्निचर असलेले हे एकमेव जहाज असल्याचं क्रूजचे संचालक राज सिंह यांनी सांगितलं. भारतातील आर्ट हिस्टोरियन डॉ. अन्नपूर्णा गर्रीमाला यांनी या क्रूजचे डिझाइन केले आहे.
•  हे क्रूज कोलकाता येथील एका शिपयार्डमध्ये तयार करण्यात आले आहे. २०२० मध्येच खरंतर याची निर्मिती झाली होती, मात्र कोरोना संकटामुळे त्याचं उद्घाटन झालं नव्हतं.
•  3 मजली जहाजात जवळपास 18 सूट म्हणजेच लक्झरी खोल्या आहेत.
•  खोलीत कन्व्हर्टेबल बेड, फ्रेंड बालकनी, एअर कंडिशनर, सोफा, एलईडी टीव्ही, स्मोक अलार्म, अटॅच बाथरुम यासारख्या अनेक सुविधा आहेत.

जहाजाचा मार्ग कसा?

आज 13 जानेवारी रोजी हे जहाज वाराणसी येथून रवाना होईल. 51 दिवसांचा प्रवास करून पुन्हा आसाम राज्यातील डिब्रूगढमध्ये पोहोचेल.
– या प्रवासात भारतातली पाच राज्य- उत्तर प्रदेश, बिहार, झारखंड, पश्चिम बंगाल, आसाम तसेच बांग्लादेशातूनही प्रवास करेल. बांग्लादेशमध्ये हे जहाज 15 दिवस थांबेल.

तिकिट काय?

जगातील सर्वाधिक लांबीच्या रिव्हर क्रूजच्या पहिल्या फेरीत स्वित्झर्लंडमधील 32 पर्यटक असतील. जहाजात एकूण ३६ प्रवासी राहण्याची सुविधा आहे.

जहाजात प्रति व्यक्ती 50 हजार रुपये प्रति दिवस असे तिकिट आकारण्यात येत आहे. पण एकदाच 51 दिवसांसाठी बुकिंग करणे अनिवार्य आहे. गरज पडली तर हा प्रवास सोडून जाता येईल.

या क्रूजमध्ये नदी पर्यटनाला प्रोत्साहन मिळेल, अशी केंद्र सरकारची भूमिका आहे.