IMA कडून रामदेव बाबांना 1000 कोटी रुपयांची मानहानीची नोटीस, 15 दिवसात माफी मागण्याचा अल्‍टीमेटम

योगगुरु रामदेव बाबा

नवी दिल्ली : डॉक्टरांवरील वादग्रस्त वक्तव्यावरुन रामदेव बाबांच्या अडचणीत वाढ होताना दिसत आहे. रामदेव बाबांनी (Ramdev Baba) अॅलोपथीवर केलेल्या आरोपांवर आता उत्तराखंड इंडियन मेडिकल काऊंसिलने (IMA Uttarakhand) त्यांना 1000 कोटी रुपयांच्या बदनामी केल्यानं नुकसान भरपाईची नोटीस पाठवली आहे. या नोटीसमध्ये रामदेव बाबांना पुढील 15 दिवसात आपल्या वक्तव्याबद्दल स्पष्टीकरण देणारा व्हिडीओ आणि लेखी माफी मागण्याचा अल्टिमेटम देण्यात आलाय (Ramdev Baba get 1000 crore defamation notice by IMA Uttarakhand for controversial statement over allopathy).

आयएमएने आपल्या नोटीसमध्ये म्हटलंय, “जर रामदेव बाबांनी पुढील 15 दिवसात स्पष्टीकरणाचा व्हिडीओ आणि लेखी माफी मागितली नाही, तर त्यांच्याकडून बदनामी केल्याप्रकरणी 1000 कोटी रुपयांच्या नुकसान भरपाईची मागणी केली जाईल.” याशिवाय नोटीसमध्ये रामदेव बाबांनी 72 तासाच्या आत कोरोनील किटच्या दिशाभूल करणाऱ्या जाहिराती सर्व ठिकाणाहून हटवाव्यात, अशीही मागणी आयएमएने केलीय. या जाहिरातींमध्ये रामदेव बाबांनी कोरोनील कोविड व्हॅक्सिननंतर होणाऱ्या साईड इफेक्टवर प्रभावी असल्याचा दावा केलाय.

6 पानांची नोटीस, 1000 कोटी रुपयांच्या दाव्याचा इशारा

रामदेव बाबांनी सोशल मीडियावर आपल्या वादग्रस्त वक्तव्याचा व्हिडीओ हटवला नाही तर आयएमए उत्तराखंड त्यांच्यावर 1000 कोटी रुपयांचा दावा करेल, अशा इशारा देण्यात आलाय. आयएमएने रामदेव बाबांना 6 पानांची नोटीस पाठवली आहे.

आयएमएचा रामदेव बाबांवर गुन्हा दाखल करण्याचाही इशारा

नोटीसमध्ये आएमएने रामदेव बाबांच्या वक्तव्याने आयएमए उत्तरखंडशी संबंधित 2 हजार डॉक्टरांचा अपमान झाल्याचं सांगितलं. तसेच एका डॉक्टरच्या बदनामीच्या 50 लाख रुपयांप्रमाणे आम्ही 1 हजार कोटी रुपयांची मागणी करतो, असं म्हटलंय. रामदेव बाबांनी आपल्या वक्तव्याने सोशल मीडियात अॅलोपथीच्या डॉक्टरांची बदनामी केल्याचा आरोपही आयएमएने केलाय. तसेच याबाबत गुन्हा दाखल करण्याचा इशारा दिलाय.