West Bengal Election 2021 : सोनारपुरात भाजप कार्यकर्त्याची हत्या, घाटालमध्ये उमेदवाराला बुटाने मारहाण!
पहिल्या टप्प्यातील मतदानापूर्वीच TMCवर भाजप कार्यकर्त्याच्या हत्येचा आरोप करण्यात आला आहे. दक्षिण 24 परगना जिल्ह्यातील सोनारपूर दक्षिणमधल रहिवासी विकास नस्कर या भाजप कार्यकर्त्याची हत्या करण्यात आली आहे.
कोलकाता : पश्चिम बंगाल विधानसभा निवडणुकीच्या पार्श्वभूमीवर राजकीय हिंसेचे अनेक प्रकार घडताना दिसत आहेत. पहिल्या टप्प्यातील मतदानापूर्वीच TMCवर भाजप कार्यकर्त्याच्या हत्येचा आरोप करण्यात आला आहे. दक्षिण 24 परगना जिल्ह्यातील सोनारपूर दक्षिणमधल रहिवासी विकास नस्कर या भाजप कार्यकर्त्याची हत्या करण्यात आली आहे. पंतप्रधान नरेंद्र मोदी आज पश्चिम बंगाल दौऱ्यावर होते. पुरुलियामध्ये त्यांनी एका रॅलीला संबोधित केलं. त्याचवेळी दुसरीकडे भाजप कार्यकर्त्याची हत्या करण्यात आल्याचा आरोप होतोय.(Attacks on BJP candidates and activists in Sonarpur, Nandigram, Ghatal in West Bengal)
पश्चिम बंगाल भाजपने दिलेल्या माहितीनुसार विकास नस्करची हत्या करण्यात आली आहे. तो बूथ नंबर 57 मधील भाजपचा कार्यकर्ता होता. ही फक्त एका युवकाची हत्या नाही तर लोकशाहीची हत्या आहे. बंगालची जनताच याचं उत्तर देईल, असं भाजपनं म्हटलंय.
केंद्रीय मंत्री धर्मेंद्र प्रधान यांच्या सभेत हल्ल्याचा आरोप
दुसरीकडे नंदीग्रामध्ये भाजप उमेदवार शुभेंदु अधिकारी यांना केंद्रीय मंत्री धर्मेंद्र प्रधान यांच्यासोबत सोनाचुडा इथं एका रोड शो मध्ये सहभागी व्हायचं होतं. मात्र, त्यावेळी भाजप कार्यकर्त्यांवर हल्ला करण्यात आला. त्यात भाजपच्या एका कार्यकर्त्याच्या डोक्याला गंभीर दुखापत झाली आहे. त्याला तातडीने नंदीग्राम रुग्णालयात भरती करण्यात आलं. याबाबत भाजपकडून निवडणूक आयोगाकडे तक्रार करण्यात आली आहे.
आज सोनाचुरा नंदीग्राम में भाजपा की रैली पर टीएमसी के गुंडों द्वारा पत्थरबाज़ी करने की शर्मनाक कृत्य की जितनी भी निंदा की जाए वह कम है।
इस हमले में स्थानीय युवा मोर्चा के हमारे एक साथी पूर्णा चंद्र पात्रो के सर पर गम्भीर चोटें आयीं व अन्य कई और साथी घायल भी हैं। pic.twitter.com/d7BcoHJsaW
— Dharmendra Pradhan (@dpradhanbjp) March 18, 2021
घाटालमध्ये भाजप उमेदवाराला बुटाने मारहाण झाल्याचा आरोप
भाजपचे पूर्व बेदिनीपूर जिल्ह्यातील घाटाल विधानसभा मतदारसंघाचे उमेदवार शीतल कपट यांच्यावर तृणमूल काँग्रेसच्या कार्यकर्त्यांनी हल्ला केल्याचा आरोप करण्यात आला आहे. स्थानिकांनी दिलेल्या माहितीनुसार उमेदवाला बुटाने मारहाण करण्यात आली आहे. तर उत्तर 24 परगनाच्या बैरकपूरमध्ये भाजपचे खासदार अर्जुन सिंह यांच्या मतदारसंघात बॉम्बस्फोट आणि भाजप उमेदवारांवर हल्ल्याच्या पार्श्वभूमीवर भाजपचं एक प्रतिनिधी मंडळ निवडणूक अधिकाऱ्यांची भेट घेणार आहे. त्यावेळी कारवाईची मागणी करण्यात येणार आहे.
पश्चिम बंगालमध्ये भाजपकडून सातत्याने राजकीय हिंसाचाराचा आरोप केला जात आहे. गुरुवारी पुरुलियामध्ये बोलताना पंतप्रधान मोदी यांनीही राजकीय हिंसाचाराबाबत चिंता व्यक्त केली होती. तसंच स्थानिक पोलीस अधिकाऱ्यांना याबाबत इशारावजा सूचनाही केली होती. असं असलं तरीही भाजप कार्यकर्त्यांवरील हल्ल्याचे प्रकार सुरुच असल्याचं पाहायला मिळत आहे.
संबंधित बातम्या :
Attacks on BJP candidates and activists in Sonarpur, Nandigram, Ghatal in West Bengal