आला हिवाळा! पर्यटक आणि विदेशी पाहुण्यांनी बहरला गोंदिया
हिवाळा सुरु होताच गोंदिया जिल्ह्यातील जलाशयावर विदेशी पक्ष्यांचे आगमन होण्याची सुरुवात होते. जिल्ह्यातील तलाव आणि पक्ष्यांचे आवडते खाद्य येथे उपलब्ध असल्याने मोठ्या संख्येने विदेशी पक्ष्यांचे आगमन होते. सध्या जलाशयांवर विदेशी पाहुण्यांचे आगमन होण्यास सुरुवात झाली आहे.
गोंदिया जिल्ह्यात परदेशी पाहुण्यांचं आगमन सुरू झालंय. हे पाहुणे इतके सुंदर आहेत की त्यांना पाहण्यासाठी खूप पर्यटक इथे जमा होतायत. पर्यटक आणि पक्षी यामुळे गोंदिया जिल्हा हिवाळ्यात चांगलाच खुलतो.
तलावांचा जिल्हा म्हणून गोंदिया जिल्ह्याची सर्वदूर ओळख आहे. सध्या वाढत्या थंडीमुळे इथे स्थलांतरित पक्ष्यांचे आगमन सुरू झाले आहे. त्यामुळे पक्षिप्रेमींचा उत्साह आणि धरणे व तलावांचे सौंदर्य वाढू लागले आहे.
अनुकूल वातावरण आणि हवे असलेल्या अन्नाची उपलब्धता लक्षात घेऊन हे पक्षी प्रवास करीत असतात. स्थलांतरित पक्षी हजारो किलोमीटर अंतर कापून नोव्हेंबर, डिसेंबर आणि जानेवारी महिन्यात इथे येतात, तर वसंत पंचमीपासून त्यांचा परतीचा प्रवास सुरू होतो.
इथे येणाऱ्या स्थलांतरित पक्ष्यांमध्ये ग्रेलॉक गुग्ज, कॉमन पोचार्ड, रेड क्रेस्टेड पोचाई, मलाई, गर्गनी, आर्क्टिक टर्न, सायबेरियन स्टॉर्क, ब्लॅक-टेलेड गॉडविट, कॉमन डिल, सायबेरियन क्रेन, नॉर्दर्न पिनटेल, ओपन बिल स्टॉर्क ब्लॅक हेड, ब्लॅक हेड एम्बिस, पांढरा स्तन, पट्टे स्टार्क, कार्मोरंट, पॅरामपल मोर्हेन, वॉटरहेन, राखाडी बगळा, कमी पंख असलेला गरुड यांचा समावेश असतो.
वनांनी वेढलेल्या तलावात बहुतांश पक्षी दिसतात. नवेगावबांध, नागझिरा, चूलबंद प्रकल्प, पुजारीटोला, बाजारटोला, परसवाडा, झिलमिली, आमगावचा नवतलाव, महादेव टेकडी परिसर, झालिया तलाव आणि अंजोरा तलाव इथे परदेशी या पक्ष्यांचा मुक्काम असतो.