विराट कोहली दुसऱ्या डावात फक्त 17 धावा करून तंबूत, पण मोडून गेला सचिन तेंडुलकरचा रेकॉर्ड
भारत आणि बांग्लादेश यांच्यात पहिला कसोटी सामन्याचा दुसरा दिवस संपला. दुसऱ्या दिवसअखेर टीम इंडियाने 3 गडी बाद 81 धावा केल्या. यावेळी विराट कोहली पुन्हा एकदा फेल गेला. अवघ्या 17 धावांवर पायचीत होत तंबूत परतला. पण मास्टर ब्लास्टर सचिन तेंडुलकरचा विक्रम मोडला.
बांगलादेशविरुद्धच्या पहिल्या कसोटी सामन्यात टीम इंडिया मजबूत स्थितीत आहे. भारताला पहिल्या डावात 227 धावांची आघाडी मिळाली आहे. तसेच दुसऱ्या डावात 3 गडी बाद 81 धावा केल्या आहेत. त्यामुळे 308 धावांपर्यंत मजल मारली आहे. शुबमन गिल नाबाद 33 आणि ऋषभ पंत नाबाद 12 धावांवर खेळत आहेत.
विराट कोहली पहिल्या कसोटीच्या दोन्ही डावात फेल गेला. पहिल्या डावात फक्त 6 धावा करता आल्या. तर दुसऱ्या डावात 17 करून तंबूत परतला. म्हणजेच त्याने एकूण 23 धावा केल्या.
विराट कोहलीने 23 धावा करत मास्टर ब्लास्टर सचिन तेंडुलकरचा एक विक्रम मोडीत काढला आहे. विराट कोहलीने आंतरराष्ट्रीय क्रिकेटमध्ये सर्वात कमी डावात 12 हजार धावा पूर्ण केल्या आहेत.
विराट कोहलीने दुसऱ्या डावात पाचवी धाव घेत हा कारनामा केला आहे. 243 डावात त्याने हा विक्रम पूर्ण केला आहे. सचिनला या विक्रमासाठी 267 डाव खेळावे लागले होते.
विराट कोहली भारतात सर्वाधिक धावा करणाऱ्या खेळाडूंच्या यादीत दुसऱ्या क्रमांकावर आहे. सचिन तेंडुलकरने 14192 धावा केल्या आहेत. तर विराट कोहली 12012 धावांसह दुसऱ्या स्थानावर आहे.
