मुंबईतील महापौर बंगल्याचा कायापालट, बाळासाहेब ठाकरे आंतरराष्ट्रीय स्मारकाचे खास फोटो समोर
बाळासाहेब ठाकरे आंतरराष्ट्रीय स्मारकाच्या पहिल्या टप्प्याचे काम यशस्वीरित्या पूर्ण झाले आहे. या कामासाठी मे. टाटा प्रोजेक्ट्स लिमिटेड या कंत्राटदाराची नेमणूक करण्यात आली होती.
बाळासाहेब ठाकरे आंतरराष्ट्रीय स्मारकाच्या पहिल्या टप्प्याचे काम यशस्वीरित्या पूर्ण झाले आहे. यातील पहिल्या टप्प्याअंतर्गत महापौर निवासस्थान इमारतीचे नूतनीकरण आणि सांस्कृतिक ठेव्याचे जतन करण्यात आले आहे.
या टप्प्यात इमारतीचे अंतर्गत व बाह्य भागातील स्थापत्य आणि विद्युत कामे पूर्ण झाली आहेत. या इमारतीला गतवैभव प्राप्त करण्यासाठी सौंदर्यीकरण करण्यात आले आहे.
या प्रकल्पाच्या पहिल्या टप्प्यात प्रवेशद्वार इमारत, प्रशासकीय इमारत आणि इंटरप्रिटेशन सेंटरचे बांधकामही पूर्ण झाले आहे. या टप्प्यात महापौर निवासस्थान इमारतीच्या सांस्कृतिक ठेव्याचे जतन करून त्याचे संग्रहालयात रुपांतरीत करण्यात आले आहे.
हे सेंटर भूमिगत स्वरूपात असून तळघरात कलाकार दालन, संग्रहालय, ग्रंथालय या दालनांचा समावेश आहे. तसेच या ठिकाणी प्रसाधनगृह आणि देखभाल कक्षही आहे.
तर प्रवेशद्वार इमारतीचे क्षेत्रफळ अंदाजे 3099.84 चौ. मी. असून ज्यात बहुउद्देशीय सभागृह, सुरक्षा नियंत्रण कक्ष, भूमिगत वाहनतळ (27 वाहने) आणि वाहनांसाठी दोन स्वतंत्र उद्वाहकांचा समावेश आहे.
तसेच, प्रशासकीय इमारत 639.70 चौ. मी. क्षेत्रफळाची आहे. यामध्ये उपहारगृह, कलाकार दालन कक्ष, प्रसाधनगृह आणि न्यासाचे अध्यक्ष आणि सचिव कार्यालये यांचा समावेश आहे. या इमारतीचे छत आधुनिक मंगलौरी कौल पद्धतीने बांधण्यात आले आहे
महापौर निवासस्थान आणि इतर संबंधित इमारतींव्यतिरिक्त, 3.00 एकर जागेत बागबगीचा तयार करून परिसराचे सुशोभिकरण करण्याचे कामे करण्यात आले आहे. या कार्यामुळे संपूर्ण परिसर सुंदर आणि आकर्षक झाला आहे
या बाळासाहेब ठाकरे आंतरराष्ट्रीय स्मारकाच्या पहिल्या टप्प्यासाठी आतापर्यंत 180.99 कोटी इतका खर्च आला आहे. तसेच आता लवकरच या स्मारकाच्या दुसऱ्या टप्प्याच्या कामाला सुरुवात होणार आहे.