अमोल कोल्हेंचा शिवाजीराव आढळराव पाटलांना वाकून नमस्कार; पाहा फोटो…
NCP Amol Kolhe and Shivajirao Adhalrao Patil Meet at Shivneri Fort : खासदार अमोल कोल्हे आणि शिवाजीराव आढळराव पाटील यांच्यात भेट झाली. किल्ले शिवनेरीवर दोघे एकमेकांसमोर आले. यावेळी अमोल कोल्हेंनी शिवाजीराव आढळराव पाटलांना वाकून नमस्कार केला. पाहा फोटो...
महाराष्ट्रासह अवघ्या देशाचं प्रेरणास्थान असणाऱ्या छत्रपती शिवाजी महाराज यांची आज तिथीनुसार जयंती आहे. त्यांना अभिवादन करण्यासाठी खासदार अमोल कोल्हे किल्ले शिवनेरीवर गेले होते. किल्ले शिवनेरीवर आलं की संघर्षाची आणि स्वाभिमानाची प्रेरणा मिळते, असं कोल्हे म्हणाले.
अमोल कोल्हे शिवनेरीवर गेले होते. त्याचवेळी राष्ट्रवादी अजित पवार गटाचे नेते आणि महायुतीचे शिरूरमधील संभाव्य उमेदवार शिवाजीराव आढळराव पाटील हे देखील शिवनेरीवर आले होते. यावेळी हे दोघे नेते एकमेकांसमोर आले.
अमोल कोल्हे हे शरद पवार गटाकडून लोकसभेच्या रिंगणात असणार आहेत. तर अजित पवार गटाकडून शिवाजीराव आढळराव पाटील लढतील. मागच्यावेळीही हे दोन्ही नेते एकमेकांच्या विरोधात लढले होते. आज हे दोघे एकमेकांसमोर आल्यावर त्यांनी हस्तांदोलन केलं.
या दोघांनी एकमेकांशी काहीवेळ बातचित केली. शुभेच्छा दिल्या. यावेळी अमोल कोल्हेंनी आढळराव पाटलांना वाकून नमस्कार केला. राजकीय विरोधकांची ही भेट, किल्ले शिवनेरीवर दिसलेलं हे दृश्य सध्या महाराष्ट्राच्या राजकीय वर्तुळात चर्चेचा विषय बनला आहे.
माध्यमांशी बोलताना अमोल कोल्हे यांनी आढळराव पाटलांच्या भेटीवर भाष्य केलं. वयस्कर व्यक्तीला वाकून नमस्कार करणं, ही आपली संस्कृती आहे. म्हणून आढळराव पाटील यांना नमस्कार केला. ही संस्कृती जपली पाहिजे. त्यांना शुभेच्छा दिल्या, असं अमोल कोल्हे म्हणाले.