BAN vs SA : कागिसो रबाडाचं कसोटीत त्रिशतक, कमी चेंडूत 300 चा पल्ला गाठत वकारचा विक्रम मोडला
बांग्लादेश आणि दक्षिण अफ्रिका यांच्यात दोन सामन्यांची कसोटी मालिका सुरु आहे. या मालिकेतील पहिला सामना सुरु असून पहिल्याच दिवशी कागिसो रबाडाने इतिहास रचला आहे. कसोटीत आपलं त्रिशतक पूर्ण केलं आहे.
दक्षिण अफ्रिका संघ दोन सामन्यांच्या कसोटी मालिकेसाठी बांग्लादेश दौऱ्यावर आहे. ढाक्यात सुरु असलेल्या पहिल्याच सामन्याच्या पहिल्याच दिवशी कागिसो रबाडाच्या नावावर एका विक्रमाची नोंद झाली आहे. त्याने बांगलादेशचे तीन गडी बाद करताच 300 विकेटचा टप्पा पूर्ण केला आहे.
मुशफिकुर रहीमची विकेट घेत रबाडाने 300 विकेट पूर्ण केल्या आहेत. विशेष म्हणजे रबाडाने कमी चेंडूत 300 विकेट घेतल्या आहेत. पाकिस्तानचा माजी वेगवान गोलंदाज वकार युनिसचा विक्रम मोडीत काढला आहे.
कागिसो रबाडाने 300 विकेट पूर्ण करण्यासाठी 11817 चेंडू घेतले. कमी चेंडूत 300 विकेट घेणारा पहिला वेगवान गोलंदाज ठरला आहे. यापूर्वी पाकिस्तानच्या वकार युनिसने 12602 चेंडूत 300 विकेट घेतल्या होत्या.
रबाडाने 65व्या कसोटी सामन्यात 300 विकेट पूर्ण केल्या आहेत. यासह त्याने अनिल कुंबळेलाही मागे टाकलं आहे. अनिल कुंबळेने 66 व्या कसोटी सामन्यात 300 विकेट घेतल्या होत्या.
सर्वात कमी कसोटी सामन्यात 300 विकेट घेणाऱ्या गोलंदाजांच्या यादीत आर अश्विन आघाडीवर आहे. त्याने 54 कसोटी सामन्यात 300 विकेटचा टप्पा गाठला आहे.
डेनिस लिलीने 56 सामन्यात हा पराक्रम केला. मुथय्या मुरलीधरने 58, डेल स्टेनने 61 कसोटी सामन्यात 300 विकेट घेतल्या आहेत. तर रबाडाला 300 विकेटसाठी 65 कसोटी सामन्यांची प्रतीक्षा करावी लागली.
