टीम इंडियाने इंग्लंड विरुद्धच्या कसोटी मालिकेत सलग 3 सामने जिंकून मालिका विजय मिळवला. टीम इंडियाचा पहिल्या सामन्यात पराभव झाला. मात्र त्यानंतर टीम इंडियाने विशाखापट्टणम, राजकोट आणि रांचीत सलग विजय मिळवून सीरिजही लॉक केली. आता धर्मशालेत पाचवा आणि अखेरचा सामना जिंकून टीम इंडियाचा 4-1 ने मालिका जिंकण्याचा प्रयत्न असणार आहे.
टीम इंडिया विरुद्ध इंग्लंड यांच्यातील पाचवा सामना हा धर्मशालेतील एचपीसीए क्रिकेट स्टेडियममध्ये होणार आहे. या सामन्याला सकाळी 9 वाजून 30 मिनिटांनी सुरुवात होणार आहे. टीम इंडियाचा हा या मैदानातील दुसरा कसोटी सामना असणार आहे.
टीम इंडियाने या मैदानात पहिला आणि एकमेव कसोटी सामना हा ऑस्ट्रेलिया विरुद्ध 2017 साली खेळला होता. टीम इंडियाने या सामन्यात ऑस्ट्रेलियावर 8 विकेट्सने विजय मिळवला.
टीम इंडियाकडून त्या सामन्यात कुलदीप यादव आणि रवींद्र जडेजा या दोघांनी 4-4 विकेट्स घेतल्या होत्या. तर आर अश्विन यानेही चौघांना मैदानाबाहेरचा रस्ता दाखवला होता. त्यामुळे आताही या त्रिकुटाकडून अशाच कामगिरीची अपेक्षा असणार आहे.
युवा यशस्वी जयस्वाल याने इंग्लंड विरुद्धच्या कसोटी मालिकेत बॅटिंगने धमाकेदार कामगिरी केली आहे. यशस्वीने आतापर्यंत 4 सामन्यांमधील 8 सामन्यात 655 धावा केल्या आहेत. यशस्वीने या मालिकेत सलग 2 द्विशतकं झळकावली आहेत. त्यामुळे यशस्वीकडून अखेरच्या सामन्यातही अशाच तडाखेबंद फलंदाजीची अपेक्षा असणार आहे.
उभयसंघातील हा पाचवा सामना मोबाईलवर जिओ सिनेमा एपवर पाहता येईल. तसेच टीव्हीवर स्पोर्ट्स 18 नेटवर्कच्या चॅनेलनवर क्रिकेट सामना पाहता येईल.