टीम इंडिया दक्षिण आफ्रिका दौऱ्यात टी 20, एकदिवसीय आणि कसोटी मालिका खेळणार आहे. या तिन्ही मालिकांमध्ये 3 वेगवेगळे कर्णधार असणार आहेत. 10 डिसेंबरपासून टी20 मालिकेच्या माध्यमातून दक्षिण आफ्रिका दौऱ्याला सुरुवात होईल. त्यानंतर दुसरा आणि तिसरा सामना हा अनुक्रमे 12 आणि 14 डिसेंबरला होईल.
टीम इंडिया विरुद्ध दक्षिण आफ्रिका यांच्यातील टी 20 मालिकेतील तिन्ही सामने हे भारतीय वेळेनुसार रात्री 9 वाजून 30 मिनिटांनी सुरु होतील. टी 20 मालिकेनंतर एकदिवसीय मालिकेला सुरुवात होईल.
उभयसंघातील एकदिवसीय मालिकेला 17 डिसेंबरपासून सुरुवात होईल. जोहान्सबर्गला सलामीचा सामना होईल. तर त्यानंतर 19 डिसेंबरला दुसरा आणि 21 डिसेंबरला तिसरा सामना होईल. पहिल्या सामन्याला दुपारी 1 वाजून 30 मिनिटांनी सुरुवात होईल. तर उर्वरित 2 सामन्यांना दुपारी 4 वाजून 30 मिनिटांनी सुरुवात होईल.
त्यानंतर दौऱ्याची सांगता ही कसोटी मालिकेने होणार आहे. एकूण 2 सामन्यांची ही मालिका असणार आहे. मालिकेतील पहिला सामना 26 डिसेंबरला होणार आहे. पहिला सामना सेंच्युरियन इथे होणार आहे. तर दुसरा आणि शेवटचा सामना हा 3 जानेवारीला केपटाऊन इथे होणार आहे. या दोन्ही सामन्यांना दुपारी 2 वाजता सुरुवात होणार आहे.
टीम इंडिया-दक्षिण आफ्रिका यांच्यातील तिन्ही मालिकांमधील प्रत्येक सामना हा स्टार स्पोर्ट्स नेटवर्कवरील चॅनेल्सवर पाहता येईल. तर मोबाईलवर सामना पाहण्यासाठी डिज्नी प्लस हॉटस्टार एप डाऊनलोड करावा लागेल.