आयपीएल दरम्यान पृथ्वी शॉ अडचणीत! सेल्फी प्रकरणाला आलं नवं वळण
दिल्ली कॅपिटल्सचा सलामीचा फलंदाज पृथ्वी शॉ गेल्या काही दिवसांपासून फॉर्ममध्ये नाही. त्यामुळे त्याला भारतीय संघातून वगळण्यात आलं आहे. दुसरीकडे, दिल्ली कॅपिटल्समध्ये प्लेइंग 11 मध्ये स्थान मिळवणंही कठीण झालं आहे. असं असताना पृथ्वी शॉ याला सेल्फी प्रकरण अंगाशी येणार असंच दिसत आहे. मुंबई न्यायालयाने या प्रकरणाचे तपास करण्याचे आदेश दिले आहेत.
आयपीएल स्पर्धा सुरु असताना पृथ्वी शॉ आपल्या फॉर्मसाठी धडपडत आहे. दुसरीकडे, गेल्या वर्षी झालेल्या विनयभंगाप्रकरणी मुंबई उच्च न्यायालयाने पोलिसांना तपास करण्याचे आदेश दिले आहेत. त्यामुळे अडचणीत वाढ होण्याची शक्यता आहे.
पृथ्वी शॉ आणि भोजपुरी अभिनेत्री सपना गिल यांच्यात गेल्या वर्षी सेल्फीवरून वाद झाला होता. पृथ्वी शॉने सपनाविरुद्ध प्राणघातक हल्ल्याचा गुन्हा दाखल केला होता. तर सपनाने पृथ्वी शॉविरुद्ध विनयभंगाचा आरोप केला होता. पोलिसांना शॉ विरुद्ध काहीही सापडले नाही. त्यानंतर सपना गिलने महादंडाधिकारी न्यायालयात धाव घेतली होती.
न्यायालयाने आता पृथ्वी शॉ याच्याविरुद्ध सपना गिलच्या विनयभंगाच्या तक्रारीची चौकशी करण्याचे आदेश पोलिसांना दिले आहेत.महानगर दंडाधिकारी एस.सी.तेडे यांनी पोलिसांना 19 जूनपर्यंत तपास अहवाल सादर करण्याचे निर्देश दिले आहेत.
गेल्या वर्षी म्हणजेच फेब्रुवारी 2023 मध्ये पृथ्वी शॉ त्याच्या मित्रासोबत हॉटेलमध्ये गेला होता. यावेळी सपनाने पृथ्वीसोबत सेल्फी काढला.वारंवार सेल्फी घेतल्याने नाराज झालेल्या शॉ याने हॉटेल व्यवस्थापकाला बाहेर काढण्यास सांगितले होते.
सपना आणि तिच्या मैत्रिणीने पृथ्वीची हॉटेलमधून बाहेर येण्याची सुमारे 25 मिनिटे वाट पाहिली. पृथ्वी शॉ हॉटेलमधून बाहेर पडत असताना त्याच्यावर हल्ला करण्याचा प्रयत्न केला. हा व्हिडिओ सोशल मीडियावर व्हायरल झाला होता.
शॉचा मित्र आशिषने सपना आणि तिच्या मित्राविरुद्ध पोलिसांत तक्रार दाखल केली. त्यानंतर सपनाला ओशिवरा पोलिसांनी शॉ यांच्यावर हल्ला आणि धमकी दिल्याच्या आरोपाखाली अटक केली होती.
