विराट कोहलीने पर्थ कसोटीत नकोशा विक्रमात घातली भर, रोहित-केएल राहुल सर्वच सुटले मागे
विराट कोहली हे भारतीय क्रिकेटमधील मोठं नाव.. पण गेल्या कसोटी सामन्यात त्याची रया गेल्याचं दिसत आहे. एक एक धाव करण्यासाठी त्याला झुंजावं लागत आहे. ऑस्ट्रेलियाविरुद्धच्या पहिल्या कसोटीतही काही खास करू शकला नाही. पण नकोशा विक्रमात भर घातली.
भारत आणि ऑस्ट्रेलिया यांच्यात पहिला कसोटी सामना पर्थमध्ये सुरु आहे. हा सामना वर्ल्ड टेस्ट चॅम्पियनशिप अंतिम फेरीच्या दृष्टीने महत्त्वाचा आहे. भारताच पहिला डाव 150 धावांवर आटोपला. तर भारतानेही ऑस्ट्रेलियाचं कंबरडं मोडत 67 धावांवर 7 गडी तंबूत पाठवले आहेत.
पहिल्या कसोटीच्या पहिल्या डावात सर्वांच्या नजरा विराट कोहलीकडे खिळल्या होत्या. ऑस्ट्रेलियात आधीच ठाण मांडून बसल्याने वातावरणाशी जुळवून चांगली खेळी करेल अशी अपेक्षा होती. मात्र काहीच खास करू शकला नाही. विराट कोहली फक्त 5 धावा करून तंबूत परतला. जोश हेझलवूडच्या गोलंदाजीवर उस्मान ख्वाजाच्या हाती झेल देऊन बाद झाला.
असं असताना विराटने जसप्रीतच्या गोलंदाजीवर एक झेल देखील सोडला. दुसऱ्या स्लिपमध्ये मार्नस लाबुशेनचा सोपा झेल हातातून पडला. लाबुशेनचं तेव्हा खातंही खुललं नव्हतं. सुदैवाने लाबुशेन जास्त काही करू शकला नाही आणि सिराजच्या गोलंदाजीवर 2 धावा करून बाद झाला.
विराट कोहलीने हा झेल सोडल्यानंतर नकोशा विक्रमात आणखी एक भर घातली आहे. विराट कोहलीने मागच्या पाच वर्षात तिन्ही फॉर्मेटमध्ये सर्वाधिक 47 झेल सोडले आहेत.
झेल सोडणाऱ्या खेळाडूंच्या यादीत रोहित शर्मा आणि केएल राहुल संयुक्तरित्या दुसऱ्या स्थानावर आहेत. त्यांनी प्रत्येकी 21 झेल सोडले आहेत. तर मोहम्मद सिराजने 20 झेल सोडले आहेत.