Arvind Sawant: “हे कसले राम, हे तर हराम!” युवा आमदाराच्या ट्विटवरून अरविंद सावंत भाजपवर बरसले…

मुंबई : भाजपच्या राजकारणात हिंदुत्वाचा मुद्दा फार महत्वाचा आहे. प्रभू राम तर भाजपच्या आस्थेचा विषय… रामाच्या मुद्द्यावर भाजप अधिक आक्रमकतेने बोलतं. शिवसेनाही हिंदुत्वाचा मुद्दा पुढे करते. पण सध्या ‘रामा’च्या मुद्द्यावरून भाजप अडचणीत येण्याची शक्यता आहे. शिवसेनेनं ‘रामा’च्या मुद्द्यावरून घेरलंय. शिवसेनेचे खासदार अरविंद सावंत (Arvind Sawant) यांनी एक ट्विट करत भाजपला सवाल केलाय. भाजपचे माळशिरसचे आमदार राम सातपुते यांनी एक ट्विट केलं होतं. त्याच्या आधारे सावंतांनी भाजपवर निशाणा साधलाय. हे कसले राम हे तर हराम!, असं म्हणत त्यांनी जहरी टीका केली आहे. शिवाय भाजपचेच आमदार जर अशी असभ्य भाषा वापरणार असतील तर त्यांनी रामराज्याची भाषा करू नये, असंही ते म्हणालेत. राम सातपुतेंच्या (Ram Satpute) भाषेवर सावंत यांनी आक्षेप घेतलाय.

नेमकं काय घडलं?

भाजपचे युवा आमदार राम सातपुते यांनी एक ट्विट केलं. आधी फाटलेल्या चड्डीला ठिगळं लावा, उगाच आभाळ हेपलायचे धंदे बंद करा, असं ट्विट राम यांनी केलं होतं. त्यांनी हे ट्विट शिवसेना पक्षप्रमुख उद्धव ठाकरे यांना उद्देशून केलं होतं. त्यावर अरविंद सावंत यांनी आक्षेप घेतलाय.

सावंतांचा आक्षेप

“कोण हे राम ! सातपुते.. भाजपचे सदस्य का? काय त्यांची भाषा, हेच का भाजपचे हिंदुत्वाचे संस्कार! आदरणीयचा असा घोर अपमान करणारे राज्यकर्ते भाजपचे अलंकारात. हे कसले राम, हे तर हराम. त्यांच्यावर शोध करून शोधणे आहेत देवेंद्र फडणवीसजी रामराज्याची भाषा करू नका”, असं ट्विट अरविंद सावंत यांनी केलं आहे.

भाजप आणि रामराज्य!

भाजपच्या राजकारणात प्रभूरामाला अनन्यसाधारण महत्व आहे. हिंदुत्व, राम, अयोध्या, रामराज्य यासारख्या मुद्द्यांवर भाजप आक्रमकपणे आपली भूमिका मांडतं. अयोध्येत रामाचं मंदीर होणं हे भाजपच्या राजकीय वाटचालीतील महत्वाचा टप्पा होता. पण आता ‘रामा’च्या मुद्द्यावरूनच भाजप अडचणीत येण्याची शक्यता आहे.