खडसेंच्या प्रवेशाने राष्ट्रवादीत फेरबदलाचे संकेत, जितेंद्र आव्हाडांना प्रदेशाध्यक्षपद?
एकनाथ खडसेंना महाविकास आघाडी मंत्रिमंडळात सामावून घेण्यासाठी शिवसेना-राष्ट्रवादीत खात्यांची अदलाबदल केली जाऊ शकते.
मुंबई : एकनाथ खडसे यांनी भाजपला रामराम ठोकत राष्ट्रवादीत प्रवेश करण्याची घोषणा केली आहे. महाविकास आघाडी सरकारमध्ये एकनाथ खडसेंना सामावून घेण्यासाठी मंत्रिमंडळात फेरबदल होण्याची चिन्हं आहेत. त्यासोबतच राष्ट्रवादीतही जबाबदाऱ्यांचं फेरवाटप होण्याचे संकेत असून दिग्गज नेते जितेंद्र आव्हाड यांना प्रदेशाध्यक्षपद मिळण्याची शक्यता आहे. (Eknath Khadse may get Agriculture Ministry Jitendra Awhad may become NCP State President)
एकनाथ खडसे येत्या शुक्रवारी राष्ट्रवादीत प्रवेश करणार आहेत. खडसेंना विधानपरिषदेवर पाठवण्याच्या हालचाली सुरु आहेत. त्यानंतर एकनाथ खडसेंवर कृषी मंत्रालयाची जबाबदारी सोपवली जाण्याची शक्यता आहे.
सध्या शिवसेना नेते दादा भुसे कृषी मंत्रालयाची धुरा सांभाळतात. खडसेंना मंत्रिमंडळात सामावून घेण्यासाठी सेना-राष्ट्रवादीत खात्यांची अदलाबदल केली जाऊ शकते. कृषी मंत्रालयाच्या मोबदल्यात राष्ट्रवादीकडे असलेले गृहनिर्माण खाते शिवसेनेला दिले जाण्याची शक्यता आहे.
गृहनिर्माण खाते शिवसेनेकडे गेल्यास जितेंद्र आव्हाड यांच्याकडे मंत्रिपद राहणार नाही. त्यामुळे सध्या जयंत पाटील यांच्याकडे असलेले राष्ट्रवादीचे प्रदेशाध्यक्ष जितेंद्र आव्हाड यांच्याकडे दिले जाण्याची शक्यता नाकारता येत नाही.
VIDEO | Uddhav Thackeray | एकनाथ खडसे महाविकास आघाडीत येत असतील तर त्यांचं स्वागतच : मुख्यमंत्री उद्धव ठाकरे @OfficeofUT @EknathGKhadse pic.twitter.com/HyhAwrbbe1
— TV9 Marathi (@TV9Marathi) October 21, 2020
एकनाथ खडसे काय म्हणाले ?
काही मिळालं, नाही मिळालं याचं दु:ख नाही, देवेंद्र फडणवीसांनी छळले. मी फक्त फडणवीसांवर नाराज आहे, असं एकनाथ खडसे म्हणाले. माझ्यावर विनयभंगाचा गुन्हा दाखल झाला आणि तो देवेंद्र फडणवीसांना गुन्हा दाखल करायला लावला याचा मनस्ताप झाला, असं एकनाथ खडसे भाजपचा राजीनामा दिल्यानंतर घेतलेल्या पत्रकार परिषदेत म्हणाले.
भाजपच्या प्राथमिक सदस्यत्वाचा राजीनामा, 40 वर्ष काम केलं, खेड्यापाड्यात भाजप पोहोचली नव्हती, मुंडे, महाजन, गडकरी, फरांदे, फुंडकर, मुनंगटीवार यांच्यासोबत प्रामाणिक काम, पक्षाने अनेक मोठी पदं दिली, भाजपवर रोष नाही, केंद्रीय नेत्यावर कधीही टीका केली नाही, असे खडसेंनी सांगितले.
संबंधित बातम्या :
भाजपचा हात सोडताच खडसेंचं ट्विटरवर नवं रुप, नाव आणि कव्हरपेजही बदललं
मी सुद्धा भाजपाचा राजीनामा देतेय, रोहिणी खडसेंचाही एल्गार
खडसेंच्या राजीनाम्याने भाजपला उतरती कळा, पंकजा मुंडेंनी शिवसेनेत यावे : अर्जुन खोतकर
(Eknath Khadse may get Agriculture Ministry Jitendra Awhad may become NCP State President)