Gujrat Assembly Election | अरविंद केजरीवालांनी लिहून दिलं होतं… भविष्यवाणी खोटी ठरणार? सुरुवातीचे कौल तर….

Image Credit source: social media

अहमदाबादः आम आदमी पार्टीचे प्रमुख अरविंद केजरीवाल (Arvind Kejariwal) म्हणाले होते… लिहून घ्या.. गुजरातमध्ये (Gujrat) आपचेच सरकार येणार. मुख्यमंत्री बनेल तर आमचाच… पंतप्रधान नरेंद्र मोदी (Narendra Modi) यांचं होम ग्राउंड असलेल्या गुजरातेत हा दावा केजरीवाल यांनी केला. पण तो खोटा ठरण्याची चिन्ह आहेत.

गुजरात विधानसभा निकालांचे कौल हाती आले आहेत. एक्झिट पोल्सनी दर्शवलेल्या अंदाजांनुसार, भाजपचीच सरशी दिसून येत आहे.

182 विधानसभा सदस्यांच्या गुजरात राज्यात भाजपा आघाडीवर आहे. सुरुवातीच्या फेऱ्यांमध्ये 131 जागांवर भाजपा पुढे आहे. तर काँग्रेस पक्ष 42 जागांवर आघाडीवर आहे. आप फक्त 5 जागांवर पुढे आहे.

केजरीवाल म्हणाले होते– गुजरातमध्ये आम आदमी पार्टीचे सरकार बनणार आहे. २७ वर्षांच्या कुशासनानंतर गुजरातच्या जनतेला भाजपासून मुक्तता मिळणार आहे…

एक्झिट पोल्सच्या अंदाजांनुसार, गुजरातमध्ये पुन्हा एकदा भाजपचेच सरकार येईल, असे म्हटले जात आहे. असे झाल्यास सातव्यांदा भाजपाचा मुख्यमंत्री खुर्चीवर बसेल.

मात्र यंदा विधानसभा निवडणुकांमध्ये पहिल्यांदाच आपची एंट्री झाल्याने भाजपा आणि काँग्रेसला फटका बसण्याची शक्यता आहे. भाजपच्या मतांवर काही प्रमाणात परिणाम होतील, असे अंदाज तज्ज्ञांकडून वर्तवले जात आहे.

2022 च्या निवडणुकांमध्ये आपचे आकडे भाजपासमोर फिके असतील मात्र गुजरातमध्ये नुकतीच एंट्री केलेला हा पक्षा आगामी विधानसभा निवडणुकांमध्ये भाजपाची मोठी डोकेदुखी ठरू शकतो, असे म्हटले जात आहे.

हिमाचल विधानसभेचं काय?

68 विधानसभा सदस्य असलेल्या हिमाचल प्रदेशात काँग्रेसची सत्ता भाजप उलथून टाकते की काय, अशी चिन्ह आहेत. सुरुवातीला हाती आलेल्या कौलांनुसार,68 पैकी 36 जागांवर भाजप पुढे आहे. काँग्रेस 31 जागांवर पुढे आहे. तर आपने अद्याप खाते उघडल्याचे दिसून येत नाहीये.