शिंदेगटात प्रवेशाची चर्चा, मिलिंद नार्वेकर यांची एक कृती सगळ्या प्रश्नांची उत्तरं देते…

दिनेश दुखंडे, TV9 मराठी, प्रतिनिधी, मुंबई : शिवसेना पक्षप्रमुख उद्धव ठाकरे (Uddhav Thackeray) यांचे अत्यंत निकटवर्तीय शिवसेनेचे सचिव मिलिंद नार्वेकर (Milind Narvekar) एकनाथ शिंदे यांच्यासोबत जाणार असल्याची चर्चा आहे. ते लवकरच शिंदेगटात प्रवेश करतील अशी चर्चा होत असतानाच नार्वेकर यांनी आपल्या कृतीतून या सगळ्या प्रश्नांची उत्तरं दिली आहेत. येणाऱ्या काळात ते कुणासोबत असतील याचा फोटो टीझरच समोर आलाय असं आपण म्हणू शकतो.

मिलिंद नार्वेकर हे लवकरच शिंदे गटात जाणार असल्याच्या बातम्यांनी महाराष्ट्राच्या राजकारणात धुमाकूळ घातला आहेत. अशात काल रात्री नार्वेकर यांनी शिवाजी पार्कात जाऊन शिवसेनेच्या दसरा मेळाव्याच्या तयारीची पाहणी केली.

काल रात्री 10:30 वाजता मिलिंद नार्वेकर हे शिवाजी पार्कात आले होते. दसरा मेळाव्याच्या तयारीचा आढावा घेतला. पाहणीनंतर उद्धव ठाकरे यांना फोन करून त्यांनी एकूण तयारीचा तपशील दिला. तयारी कुठपर्यंत आली आहे, याची माहिती दिली.

तसंच नार्वेकर यांनी देवीचं दर्शनही घेतलं. शिवाजी पार्कामध्ये बंगाल क्लब यंदा नवरात्रोत्सव साजरा करत आहे.नार्वेकर यांनी या देवीचं दर्शन घेतलं.

शिंदे गटाचे आमदार आणि राज्याचे पाणीपुरवठा मंत्री गुलाबराव पाटील यांनी मिलिंद नार्वेकर लवकरच शिंदे गटात येणार असल्याचं म्हटलं. त्यांच्या या विधानाने सर्वत्र एकच चर्चा सुरू झाली. त्यांनी या सगळ्या चर्चांना आपल्या कृतीतून उत्तर दिलं आहे.

दसरा मेळावा

यंदाचा दसरा मेळावा विशेष आहे. शिंदेगटाच्या बंडानंतरचा हा पहिला दसरा मेळावा आहे. त्यामुळे उद्धव ठाकरे शिंदेगटासह भाजपवर टीका करणार हे पाहणं महत्वाचं असेल.