EXCLUSIVE : कामं थांबवा, नितीन गडकरींच्या स्फोटक पत्रानंतर आता शिवसैनिकाची कथित Audio क्लिप समोर
Nitin Gadkari letter to Uddhav Thackeray : या पत्रानंतर आता महामार्गाचं काम थांबवण्यासाठी कशाप्रकारे धमकी दिली जाते, त्याबाबतची कथित ॲाडिओ क्लिप टीव्ही 9 मराठीच्या हाती लागली आहे. ही ॲाडिओ क्लिप वाशिम शिवसेना पदाधिकाऱ्याची असल्याचं सांगण्यात येत आहे.
मुंबई : केंद्रीय रस्ते वाहतूक मंत्री नितीन गडकरी (Nitin Gadkari) यांनी महाराष्ट्राचे मुख्यमंत्री उद्धव ठाकरे (CM Uddhav Thackeray) यांना स्फोटक पत्र लिहिलं आहे. या पत्रात गडकरींनी विकासकामात शिवसैनिक आड येत असल्याचा थेट दावा केला आहे. शिवाय हे असेच चालत राहिले तर महाराष्ट्रातील राष्ट्रीय महामार्गावरील कामे मंजूर करण्याच्या संदर्भात आमच्या मंत्रालयाला विचार करावा लागेल. महाराष्ट्राचे आणि जनतेचे नुकसान होईल, असा गर्भित इशारा नितीन गडकरी यांनी मुख्यमंत्री उद्धव ठाकरे यांना पत्राद्वारे कळवला आहे.
या पत्रानंतर आता महामार्गाचं काम थांबवण्यासाठी कशाप्रकारे धमकी दिली जाते, त्याबाबतची कथित ॲाडिओ क्लिप टीव्ही 9 मराठीच्या हाती लागली आहे. ही ॲाडिओ क्लिप वाशिम शिवसेना पदाधिकाऱ्याची असल्याचं सांगण्यात येत आहे. ॲाडिओ क्लिपमध्ये महादेव ठाकरे वाशिम असं नाव सांगितलं आहे.
जिल्हा नियोजन समिती सदस्य असल्याचं सांगून फोन करण्यात आला. राष्ट्रीय महामार्गाचं काम थांबवा असं सांगणारा फोन महादेव ठाकरे यांनी केल्याचं या ऑडिओ क्लिपमध्ये ऐकायला येतं. पत्रात उल्लेख असलेल्या सेलू बाजार जिल्हा वाशिम येथे महामार्गाचं काम थांबल्याचा व्हिडीओही टीव्ही 9 मराठीच्या हाती लागला आहे.
दरम्यान, या ऑडिओ क्लिपची पुष्टी टीव्ही 9 मराठीने केलेली नाही.
AUDIO CLIP
नितीन गडकरी यांच्या पत्रात नेमकं काय?
१. अकोला आणि नांदेड या २०२ किमी राष्ट्रीय महामार्गाच्या लांबीमध्ये चौपदरीकरणाची कामे चार पॅकेजेसमध्ये सुरु आहेत. गेडशी ते वाशिम या पॅकेज-२ मध्ये वाशिम शहरासाठी बायपास (लांबी १२ किमी) निर्माण करण्याचे काम सुद्धा समाविष्ट आहे. परंतु, प्रस्तुत बायपास व मुख्य रस्त्याचे काम तेथील शिवसेना लोकप्रतिनिधींनी थांबवले असल्याचे मला सांगण्यात आले आहे.
२. या मतदारसंघात सुरु असलेल्या मालेगाव ते रिसोड या राष्ट्रीय महामार्गेच काम एक पूल वगळता पूर्णत्वास आलेले आहे. या लांबीमध्ये पैनगंगा नदीवर उंच पुलाचे काम अर्धवट स्वरुपात आहे. ते पूर्ण करण्यासाठी कंत्राटदाराला मज्जाव केला जात आहे. काम सुरु केल्यास कार्यकर्ते येऊन धमक्या देतात. त्यामुळे कंत्राटदाराने आहे त्या स्थितीत काम अंतिम करण्याबाबत विनंती केली आहे.
३. पुलगाव-कारंजा-मालेगाव-मेहकर-सिंदखेडराजा हा राष्ट्रीय महामार्ग अतिशय खराब अवस्थेत आहे. त्याच्या दुरुस्तीचे काम (अंदाजे किंमत १३५ कोटी) आमच्या मंत्रालयाने हाती घेतले. परंतु वाशिम लोकसभा मतदारसंघातील लांबी वगळता इतर ठिकाणचे काम पूर्णत्वास आलेले आहे. वाशिम जिल्ह्यातील काम, विशेषतः सेलू बाजार गावातून जाणाऱ्या रस्त्याचे काम शिवसेना कार्यकर्त्यांनी थांबवले होते, अशी माहिती मला देण्यात आली. परिसरातील लोकांच्या मागणीनुसार आणि रस्ता धोकादायक स्थितीत असल्यामुळे कंत्राटदाराने पुन्हा काम सुरु केले असता शिवसेना कार्यकर्त्यांनी मशिनरीची जाळपोळ करुन कंत्राटदाराचे अधिकारी-कर्मचारी-कामगार यांच्यात दहशत निर्माण केली. त्यामुळे ते काम पुन्हा बंद झाले आहे.
4) उपरोक्त बाबी लक्षात घेता वाशिम जिल्ह्यातील राष्ट्रीय महामार्गावरील कामे यापुढेही सुरु ठेवावीत की कसे? याबद्दल आमचे मंत्रालय आता गांभीर्याने विचार करत आहे. ही कामे आहे त्या स्थितीत अंतिम केल्यास ती वाहतुकीसाठी धोकादायक ठरतील. अपघाताचे प्रमाण वाढेल आणि त्यामुळे जनतेच्या असंतोषाला तोंड द्यावे लागेल.
5) हे असेच चालत राहिले तर महाराष्ट्रातील राष्ट्रीय महामार्गावरील कामे मंजूर करण्याच्या संदर्भात आमच्या मंत्रालयाला विचार करावा लागेल. महाराष्ट्राचे आणि जनतेचे नुकसान होईल.
ही कामे डिस्कोप केली तरी आपण लोकांच्या दृष्टीने अपराधी ठरु. तसे झाले तर महाराष्ट्रातील नागरिक व लोकप्रतिनिधी म्हणून माझ्या मनात कायमची खंत राहील. ही कामे पुढे न्यायची असतील तर आपला हस्तक्षेप मला आवश्यक वाटतो. आपण यातून कृपया मार्ग काढावा, अशी माझी विनंती आहे.
संबंधित बातम्या