संजय राठोड यांना टक्कर देण्यासाठी उद्धव ठाकरेंनी शोधून काढला तोडीस तोड उमेदवार 

मुंबई : शिंदे गटाचे मंत्री संजय राठोडांना टक्कर देण्यासाठी, उद्धव ठाकरेंनी तोडीस तोड उमेदवार शोधून काढला आहे. संजय राठोड यांचे कट्टर विरोधक समजले जाणारे संजय देशमुख यांनी उद्धव ठाकरेंच्या उपस्थित शिवबंधन बांधून ठाकरे गटात प्रवेश केला आहे. यवतमाळ जिल्ह्यात संजय राठोड आणि संजय देशमुख हे राजकीय प्रतिस्पर्धी आहेत. तेच टायमिंग ठाकरे गटानं साधत देशमुखांना आपल्या गटात घेतले आणि आता देशमुखांनीही राठोडांना पराभूत करण्यासाठी चंगच बांधला आहे

संजय देशमुख हे, पूर्वाश्रमीचे शिवसैनिकच आहेत. शिवसेनेचे जिल्हाध्यक्ष म्हणून देशमुखांनी काम केलं 1999मध्ये शिवसेनेनं तिकीट नाकारल्यानं दिग्रसमधून त्यांनी अपक्ष निवडणूक लढली. त्यावेळी 125 मतांनी राष्ट्रवादीचे उमेदवार ख्वाजा बेग यांचा पराभव करुन पहिल्यांदा आमदार झाले

त्याचवेळी विलासराव देशमुखांच्या सरकारला पाठींबा देत राज्यमंत्रीही झाले. 2004 मध्ये पुन्हा दिग्रस मतदारसंघातून अपक्ष लढत दुसऱ्यांदा आमदार झाले.
2009 मध्ये देशमुख काँग्रेसच्या तिकीटावर लढले पण संजय राठोडांनी त्यांचा 54 हजार मतांनी पराभव केला. 2019च्या लोकसभा निवडणुकीपूर्वी संजय देशमुख काँग्रेसमधून भाजपमध्ये आले.

युतीमुळं त्यांना 2019 मध्ये विधानसभेचं तिकीट मिळालं नाही त्यामुळं पुन्हा बंड करत संजय राठोडांच्या विरोधात अपक्ष लढले
पुन्हा 2019 मध्ये राठोडांनी संजय देशमुखांना 63 हजार मतांनी पराभूत केलं

आता स्थिती बदलली आहे. शिवसेनेत फूट पडली आहे. त्यामुळं ठाकरे आणि शिंदे असे दोन गट पडलेत. हीच संधी साधत, संजय देशमुखांनीही 2024ची तयारी करत ठाकरे गटात प्रवेश केला. आणि आता उद्धव ठाकरेंचा दारव्हा इथं मोठा मेळावाही घेणार आहेत

काही दिवसांआधीच पोहरादेवीतले महंत सुनील महाराज ठाकरे गटात आलेत. सुनील महाराजही राठोडांच्या विरोधात गेलेत. तेही निवडणूक लढण्यास इच्छूक आहेत. त्यामुळं संजय राठोडांच्या विरोधात दिग्रसमधून संजय देशमुख तर दारव्हा मतदारसंघातून सुनिल महाराज लढू शकतात. म्हणजेच संजय राठोडांना घेरण्यासाठी उद्धव ठाकरेंनी पूर्ण रणनीती आखली आहे असचं म्हणाव लागेल.