Supreme court : …म्हणून महाराष्ट्राच्या सत्तासंघर्षाची सुनावणी आजऐवजी उद्या होणार! महत्त्वाचं कारण समोर
Supreme court on Eknath shinde vs shiv sena Live : न्यायमूर्ती एन व्ही रमण्णा, सी. टी रविकुमार, हिमा कोहली या तीन न्यायाधीशांच्या खंडपीठासमोर ही सुनावणी होते आहे. यापैकी सी टी रविकुमार आज उपलब्ध नसल्याची नोटीस आली आहे. सी टी रविकुमार गैरहजर असल्यामुळे आजची सुनावणी उद्यावर गेली असल्याचं सांगितलं जातंय.
नवी दिल्ली : महाराष्ट्राच्या सत्तासंघर्षावर (Maharashtra Political Crisis) सुप्रीम कोर्टात (Supreme Court) आज सुनावणी पार पडणार होती. या सुनावणीकडे सगळ्याचं लक्ष लागलं होतं. मात्र गही सुनावणी आजऐवजी उद्या होणार आहे. असं होण्यामागचं कारणही आता समोर आलंय. सुप्रीम कोर्टात सुनावणी (Eknath Shinde vs Shiv sena Hearing) तीन जणांच्या खंडपीठासमोर सुरु आहे. न्यायमूर्ती एन व्ही रमण्णा, सी. टी रविकुमार, हिमा कोहली या तीन न्यायाधीशांच्या खंडपीठासमोर ही सुनावणी होते आहे. यापैकी सी टी रविकुमार आज उपलब्ध नसल्याची नोटीस आली आहे. सी टी रविकुमार गैरहजर असल्यामुळे आजची सुनावणी उद्यावर गेली असल्याचं सांगितलं जातंय. तीन जणांच्याच खंडपीठासमोर सुनावणी होणं अपेक्षित असल्यानं ही सुनावणी पुढे ढकलण्यात आली असल्याचं सांगितलं जातंय.
पाच याचिकांवर सुनावणी
महाराष्ट्राचा सत्तासंघर्ष आता न्यायालयीन लढ्यापर्यंत पोहोचला आहे. खरी शिवसेना कुणाची? राज्यपालांची भूमिका, विधानसभा अध्यक्षांची निवड, बंडखोर 12 आमदारांच्या निलंबनाचा विषय, विधानसभा उपाध्यक्षांबाबत बंडखोर आमदारांनी आणलेला प्रस्ताव, अशा एकमेकांशी संबंधित असणाऱ्या गुंतागुंतीच्या राजकीय पेचावर सुप्रीम कोर्टात नेमका काय निर्णय होतो, याकडे संपूर्ण राज्याचं लक्ष लागलं आहे.
शिवसेनेच्या इतिहासातलं आतापर्यंतचं सगळ्यात मोठं बंड शिवसेनेनं एकनाथ शिंदे यांच्या रुपात पाहिलंय. त्यानंतर विस्कळीत झालेली शिवसेनेची घडी बसवण्याचं आव्हानही उद्धव ठाकरेंसमोत आहे. शिवाय धनुष्यबाण हे चिन्ह नेमकं कुणाला मिळणार, यावरुनही चढाओढ पाहायला मिळतेय. त्यासाठीही कागदोपत्री लढा सुरु असल्याचं महाराष्ट्र पाहतोय. या सगळ्या अनुशंगाने करण्यात आलेल्या एकूण पाच याचिकांवर सध्या सुप्रीम कोर्टात एका विशेष खंडपीठासमोर सुनावणी सुरु आहे.
दरम्यान, सुनावणी जरी पुढे ढकलली गेली असली, तरी अनिल परब आणि सुभाष देसाई हे राजधानी दिल्लीत दाखल झाले आहे. सुप्रीम कोर्टातही त्यांनी सकाळी हजेरी लावली. यावेळी कोर्टात जाताना अनिल परब यांच्याशी बातचीत करण्याचा प्रयत्नही टीव्ही 9 मराठीच्या प्रतिनिधींनी केला. मात्र अनिल परब यांनी कोणतीही प्रतिक्रिया देणं टाळलं.