मंत्र्याच्या पत्नीची मानहानी भोवली, तृणमूलच्या खासदाराला 50 लाख दंड, असे आहे महाराष्ट्र कनेक्शन
तृणमूल काँग्रेसचे खासदार साकेत गोखले यांना मानहानीच्या प्रकरणात केंद्रीय मंत्री हरदीप सिंग पुरी यांच्या पत्नी लक्ष्मी पुरी यांना 50 लाख रुपये द्यावे लागणार आहेत. दिल्ली उच्च न्यायालयाने सोमवारी हा आदेश दिला. यासोबतच न्यायालयाने दोन मोठ्या अटीही खासदार गोखले यांना घातल्या आहेत.
तृणमूल काँग्रेसचे राज्यसभेतील खासदार साकेत गोखले यांना मानहानी प्रकरणी 50 लाख रुपये द्यावे लागणार आहेत. दिल्ली उच्च न्यायालयाने सोमवारी याबाबतचा आदेश दिला आहे. न्यायालयाने 8 आठवड्यांच्या आत या आदेशाची अंमलबजावणी करण्याचे आदेशही दिले आहेत. खासदार साकेत गोखले यांनी केंद्रीय मंत्री हरदीप सिंग पुरी यांच्या पत्नी लक्ष्मी पुरी यांच्यावर गंभीर आरोप केले होते. त्यामुळे लक्ष्मी पुरी यांनी त्यांच्यावर मानहानीचा खटला दाखल केला होता. न्यायालयाने या प्रकरणी खासदार साकेत गोखले यांना लक्ष्मी पुरी यांना 50 लाख रुपये देण्याचे आदेश दिले आहेत.
हरदीप सिंग पुरी हे मोदी सरकारमध्ये पेट्रोलियम आणि नैसर्गिक वायू मंत्री आहेत. राज्यसभेतील तृणमूल काँग्रेसचे खासदार साकेत गोखले यांनी हरदीप सिंग पुरी यांच्या पत्नी लक्ष्मी पुरी यांच्यावर स्वित्झर्लंडमध्ये अघोषित संपत्तीसह मालमत्ता खरेदी केल्याचा आरोप ट्विटद्वारे केला होता. त्यामुळे लक्ष्मी पुरी यांनी दिल्ली उच्च न्यायालयात साकेत गोखले यांच्याविरोधात मानहानीचा खटला दाखल केला होता. या प्रकरणातील सुनावणीदरम्यान, न्यायालयाने 2021 मध्ये गोखले यांनी त्यांचे बदनामीकारक ट्विट काढून टाकण्याचे आदेश दिले होते. याशिवाय गोखले यांनी पुरी कुटुंबावर असे आरोप करणारे ट्विट करू नयेत, असे आदेशही देण्यात आले होते.
उच्च न्यायालयाने या प्रकरणी आज साकेत गोखले यांना लक्ष्मी पुरी यांची बदनामी केल्याप्रकरणी 50 लाख रुपये त्यांना देण्याचे आदेश दिले. 50 लाख रुपये भरण्यासोबतच साकेत गोखले यांना एका मोठ्या वृत्तपत्रात प्रसिद्ध झालेले माफीनामा पत्रही द्यावे. तसेच, X हँडलवरही माफी मागावी असे न्यायालयाने आपल्या आदेशात म्हटले आहे.
साकेत गोखले यांचे काय आहे महाराष्ट्र कनेक्शन?
पश्चिम बंगालमध्ये ममता बॅनर्जी यांच्या तृणमूल काँग्रेस पक्षाने साकेत गोखले यांना राज्यसभेवर संधी दिली. माहिती आधिकार कार्यकर्ते म्हणून परिचित असलेल्या साकेत यांना तृणमुलने पक्षात कामाची संधी दिली. त्यांनी संधीचे सोने करत साकेत गोखले यांनी झोकून पक्षाचे काम केले. त्यामुळेच त्यांना तृणमृल काँग्रेसने राज्यसभेवर पाठविले. साकेत हे तृणमूल काँग्रेस पक्षाचे राष्ट्रीय प्रवक्ते आहेत.
साकेत गोखले हे मूळचे नाशिकचे असून ते राजकारणात येण्यापूर्वी पत्रकारिता करीत होते. त्यांचे वडील सुहास गोखले हे नाशिकच्या पंचवटी भागातील कपालेश्वर मंदिरामागे खांदवे सभागृहाजवळ राहतात. मुंबईत विल्सन कॉलेज येथे साकेत यांचे शिक्षण झाले आहे. येथेच माहिती आधिकार कार्यकर्ते म्हणून ते नावारूपाला आले. राजकीय पत्रकारिता करत असताना नवी दिल्लीत काँग्रेस नेते राहुल गांधी यांच्याशी परिचय झाल्यानंतर त्यांनी काही काळ काँग्रेसचे काम केले.