ENG vs PAK Toss | इंग्लंडने पाकिस्तान विरुद्ध टॉस जिंकला, पाहा दोन्ही संघांची प्लेईंग ईलेव्हन

कोलकाता | आयसीसी वनडे वर्ल्ड कप 2023 मधील 44 व्या सामन्यात इंग्लंड विरुद्ध पाकिस्तान आमनेसामने आहेत. या सामन्याचं आयोजन हे कोलकातामधील इडन गार्डनमध्ये करण्यात आलं आहे. या सामन्याला दुपारी 2 वाजता सुरुवात होणार आहे. त्याआधी 1 वाजून 30 मिनिटांनी टॉस झाला. इंग्लंडने टॉस जिंकला. कॅप्टन जॉस बटलर याने बॅटिंगचा निर्णय घेत पाकिस्तानला बॉलिंगसाठी भाग पाडलं. पाकिस्तानसाठी हा सामना करो या मरोच्या पलीकडचा आहे. पाकिस्तानला सेमी फायनलमध्ये पोहचण्यासाठी ऐतिहासिक फरकाने विजय मिळवावा लागणार आहे.

इंग्लंडने पाकिस्तान विरुद्धच्या सामन्यासाठी प्लेईंग ईलेव्हनमध्ये कोणताही बदल केलेला नाही. कॅप्टन जॉस बटलर याने आपल्या त्याच 11 खेळाडूंवर विश्वास दाखवला आहे. तर पाकिस्तानने प्लेईंग ईलेव्हनमध्ये एक बदल केला आहे. हसन अली इंग्लंड विरुद्धच्या सामन्यात खेळत नाहीये. तर हसनच्या जागी शादाब खान याला संधी देण्यात आली आहे. पाकिस्तान आणि इंग्लंड या दोन्ही संघांचा हा वर्ल्ड कप साखळी फेरीतील नववा आणि अखेरचा सामना आहे.

हेड टु हेड रेकॉर्ड्स

पाकिस्तान आणि इंग्लंड दोन्ही संघ वनडे वर्ल्ड कपमध्ये आतापर्यंत एकूण 10 वेळा आमनेसामने आले आहेत. यामध्ये पाकिस्तान इंग्लंडवर वरचढ राहिली आहे. इंग्लंडने पाकिस्तानवर 4 सामन्यात मात केली आहे. तर पाकिस्तानने इंग्लंडवर 5 सामन्यात विजय मिळवला आहे. मात्र आता पाकिस्तानला फक्त विजय मिळवून काहीच फायदा नाही, कारण त्यांना सेमी फायनलसाठी क्वालिफाय करायचं असेल, तर इंग्लंड जे विजयी धावांचं आव्हान देईल, ते अशक्य इतक्या ओव्हरमध्ये पूर्ण करावं लागणार आहे.

पाकिस्तानसाठी विजयी समीकरण

इंग्लंडने विडयासाठी 50 धावांचं आव्हान दिल्यास पाकिस्तानला 2 ओव्हरमध्ये विजय मिळवावा लागेल. फोटोमध्ये पाहा विजयी आव्हान किती षटकांमध्ये पूर्ण करावं लागणार ते.

इंग्लंड प्लेईंग ईलेव्हन | जोस बटलर (कॅप्टन आणि विकेटकीपर), जॉनी बेअरस्टो, डेविड मलान, जो रूट, बेन स्टोक्स, हॅरी ब्रूक, मोईन अली, ख्रिस वोक्स, डेव्हिड विली, गेस ऍटकिन्सन आणि आदिल रशीद.

पाकिस्तान प्लेईंग ईलेव्हन | बाबर आझम (कर्णधार), अब्दुल्ला शफीक, फखर जमान, मोहम्मद रिझवान (विकेटकीपर), सौद शकील, इफ्तिखार अहमद, आगा सलमान, शादाब खान, शाहीन आफ्रिदी, मोहम्मद वसीम जूनियर आणि हरिस रौफ.